Xave iha Lú Olo

Noémio Falcão

Debates, análiza no komentáriu sira durante la’o namanas iha sosiedade liga ho formasaun governu dahituk hatudu momos jogu demokrátiku iha Timor-Leste la’o iha ambiente paz no hakmatek nia laran.

Ne’e juistika katak mezmu Timor-Leste nu’udar nasaun foun mai ho esperiénsia ne’ebé nakonu ho dezafiu hotu ke hatasak tebes nia populasaun sira atu kontinua hakat ba oin ho ain rasik no esperansa boot.

Situasaun atuál dala ida tan sai teste boot ida ba timoroan tomak atu hakat ba oin liuliu líder polítiku sira hatudu sira-nia maturidade polítika atu tane no kuida nafatin pás no hakmatek no garante dezenvolvimentu ba oin.

Governu koligasaun FRETILIN-PD lideradu Primeiru Ministru, Marí Bin Amude Alkatiri ho estatutu minoritáriu frajil tebes, iha ne’ebé iha de’it kadeira 30 iha Uma Fukun Parlamentu Nasionál, inkuantu opozisaun ho forsa boot 35.

Liga Konstituisaun RDTL, artigu 106, loos duni katak FRETILIN nu’udar partidu mais votadu maka iha direitu ba forma governu, maibé ikus avansa ho koligasaun minoritáriu, ne’e responsabilidade iha mós Prezidente Repúblika nia liman, tanba Prezidente Repúblika maka nu’udar xave ba formasaun governu ida ne’ebé tenke iha forsa parlamentares hodi asegura destinu governu nian tuir mandatu tinan lima.

Iha kazu ida ne’e, Prezidente, Francisco Guterres ‘Lú Olo’, tenke konsiénte no tenke buka ona meius seluk hafoin opozisaun halo mosaun rejeisaun hasoru programa governu ba dahuluk iha uma fukun Parlamentu Nasionál.

Hein katak inisiativa Lú Olo nian halo ona konvite ba líder nasionál sira liuliu Prezidente CNRT, Xanana Gusmão, Prezidente PLP, Taur Matan Ruak, nune’e mos Amu Bispu hosi Dioseze Dili, Baukau no Maliana, bele hetan konsensus ida ba garante estabilidade governativa ba tinan lima.

Atu hetan konsensus ba hametin governu dahituk presiza tebes Lú Olo nia kbiit tomak nu’udar Xefe Estadu atu hahú fali prosesu foun ne’ebé hothotu mak konkorda. Tanba prosesu polítiku dadauk ne’e ida-idak mai ho nia interese iha ne’ebé falun metin ho ida-idak nia dignidade, maka iha kazu ne’e Lú Olo mak tenke brani ho matenek liu dalan ida maka halo remodelasaun radikal ba governu dahituk ka konvida partidu hetan votu barak daruak forma governu daualu. Ita hein...!

Responsabilidade FRETILIN

Noémio Falcão

FRETILIN nu’udar partidu mais votadu rejultadu hosi eleisaun jerál iha loron 22, fulan-Jullu, Tinan 2017. Rejultadu eleisaun ba periodu ida ne’e hatúr FRETILIN hetan kadeira 23, CNRT hetan kadeira 22, PLP kadeira 8, PD kadeira 7 no KHUNTO hetan kadeira 5.

Haktuir konstituisaun RDTL, artigu 106, alinea dahuluk, FRETILIN mak iha direitu atu forma governu. Ikus mai halo koligasaun ho PD total kadeira 30. Ne’e hatudu governu koligasaun ne’e avansa ho governu minoritáriu, iha ne’ebé la garante estabilidade governativa durante mandatu.

La to’o fulan ida Prezidente Repúblika, Francisco Guterres ‘Lú Olo’ nomeia Marí Bin Amude Alkatiri nu’udar Primeiru Ministru ba governu dahituk ne’e, no fó posse, la liu fulan ida, kankada opozisaun CNRT, PLP ho KHUNTO ho kadeira hamutuk 35 forma forsa polítika hanaran Aliansa Maioria Parlamentar (AMP).

Rejultadu  hosi governu koligasaun avansa ho estatutu minoritáriu, iha aprejentasaun programa governu nian ba Parlamentu Nasional hetan rejeisaun hosi bloku opozisaun. Nune’e tuir konstituisaun sei iha oportunidade daruak ba governu hadi’a no lori hikas ba hetan apresiasaun iha Parlamentu Nasionál.

Ita hein katak iha periodu preparasaun ba segundu aprejentasaun programa governu nian, líder sira iha governu koligasaun liuliu Primeiru Ministru, Marí Alkatiri asume responsabilidade ida ne’e atu kontinua halo aprosimasaun ho bankada opozisaun sira hodi garante estabilidade governativa durante tinan lima.

Passu di’ak liu iha prosesu aprosimasaun ke Primeiru Ministru Marí Alkatiri alias governu koligasaun tenke halo maka hatudu hakraik a’an reprejenta povu ho responsabilidade tomak, ko’alia mamar no hatudu respeitu ba reprejentante povu hotu iha uma fukun nu’udar xave atu hetan simpatia.

Normalmente prinsípiu partidu nu’udar organizasaun polítika ida ne’ebé involve iha batalla eleisaun jeral hodi manan poder alias kaer ukun, tanba ne’e iha nasaun demokrátiku sira, espesialmente iha Timor Leste, deputadu sira nu’udar reprejentante povu ho livremente ejerse sira nia direitu ba interese partidu nian. 

Tanba ne’e, iha atmosfera polítika dadaun ne’e  liuliu Alkatiri tenke buka lee hetan polítika AMP nu’udar forsa polítika maioria iha Parlamentu Nasionál halo rejeisaun ba progrma governu nian, bele tanba rajaun programa maka ladi’ak duni, ka, tanba prosesu hari governu dahituk ne’e inkonstitusional, ou tanba interese partidu ida-idak nian iha ne’ebé iha forsa atu hadau ukun hosi FRETILIN ho nia aliadu.

Hirak ne’e hotu presiza análiza no halo avaliasaun hodi fó resposta ne’ebé ho kalmu, tau aan hanesan líder katuas, hatudu uluk ejemplu katuas nian maka hadomi no respeitu malu la haree ba otas nurak ka tuan, nein kór no rasa.

Husi ne’e mak katuas sira bele hetan fatin ne’ebé dignu iha jogu demokrátiku ne’ebé la’o dadauk tuir natureja polítika iha Timor Leste. 

Rai ne’e sarani ona ho naran lulik demokrátiku, deputadu sira iha Parlamentu Nasionál la’ós hatama kurikulum vitae (CV), maibé povu mak hili, no ne’e presiza ita hotu nia respeitu ba sira-nia desizaun maioria.

Insulta, tolok ka halo violénsia ne’e krime, maibé iha uma fukun debates la’o demokrátikamente ne’e hatudu nasaun foun ne’e sai boot liu tan. Ita hein...!

Ita Hein...

Noémio Falcão

Temperatura polítika iha rai laran hahú manas liután bainhira partidu opozisaun CNRT, PLP ho KHUNTO aranja forsa maioritáriu ho kadeira 35, ho hanaran Aliansa Maioria Parlamentar (AMP) no fó ona xamada ba Prezidente Repúblika, Francisco Guterres ‘Lú Olo’, katak governu lideradu Marí Bin Amude Alkatiri frajil tebes tanba avansa ho minoritáriu ho de’it kadeira 30.

Minutu, oras, loron, semana ba fulan troka ba tinan, la’o ba oin nafatin. Husi tempu ba tempu mudansa polítika mos la’o. Partidu polítiku liman, FRETILIN, CNRT, PLP, PD ho KHUNTO, ne’ebé povu delega liuhosi eleisaun jerál tenke toma responsabilidade tomak hodi serví duni povu ho rai ne’e ba moris di’ak.

Partidu polítiku nu’udar organizasaun polítika ida, líder polítiku sira hahoris partidu ida-idak hodi partisipa iha jogu polítiku iha país demokrátiku sira ho regras, baze maka konstituisaun RDTL, iha ne’ebé tenke toma responsabilidade ida ne’e hodi garante pás no estabilidade no fó moris di’ak ba povu.

Realmente governu konstitusionál dahituk lideradu Marí Alkatiri ho nia membru hamutuk 32 simu ona posse hosi Prezidente Repúblika hodi kumpri dever nu’udar servidór estadu, maibé polítikamente governu koligasaun FRETILIN-PD ne’e hakarak ka lakohi tenke hasoru duni laloran boot iha ne’ebé ameasa tebes estabilidade governasaun.

Tuir konstituisaun artigu 108, iha pontu rua nian, primeiru ministru hato’o programa governu nian ne’ebé Konsellu Ministru aprova ho apresia husi parlamentu nasional iha prazu a’as liu loron tolunulu husi loron ne’ebé hahu funsaun governu nian.

Tanba ne’e, governu ne’e atu monu ka la monu, depende ba artigu 112, iha alidea (d) haktuir, bainhira Parlamentu Nasionál la simu ka la aprova programa governu nian dala rua tutuir malu, maka demisaun governu alias governu monu.

Deklarasaun polítika sira hahú manas iha sosiedade nia leet, pro no kontra ba ejisténsia governu dahituk ho nia estatutu minoritáriu kontinua manas, maibé iha tempu hanesan sorte boot liu ba rai ne’e nia povu maka matenek duni, lakohi tan monu ba lasu polítiku sira nian no sira hakarak de’it moris hakmatek, tanba sira konsiente katak tempu naruk nia laran sira terus resik ona.

Oportunidade ida ne’e devia polítiku sira konsidera hanesan osan mean ida hodi konsentra ba dezenvolvimentu paíz, maibé kazu kontráriu nota hosi deklarasaun no jogu polítika sira durante ne’e nota momos kaan ukun hatudu iha sira nia reen toos hafalun ho palavra lulik “sentidu estadu”.

Fi’ar katak timoroan hotu liuliu líder polítiku sira ho matenek boot tetu ho konsikuensia tomak ba rai no povu ne’e nia di’ak ho jogu polítiku hotu, hodi labele kari nafatin rai rahun ba povu nia matan no hadelek povu ho rasionaliza argumentu hotu hodi kontinua soran povu.

Jinástika demokrasia ho livremente maibé tenke ho responsabilidade tomak. Hotu hatuur ona iha konstituisaun ba timoroan tomak iha jogu polítiku labele hateke malu hanesan inimigu permanente maibé ho maturidade tomak hateke ba kotuk hatene istória, maibé hamriik iha ain rasik nu’udar timoroan, hamutuk no hakat ba oin.

Sé de’it maka ukun, partidu ka ema hirak hetan fi’ar ba kaer ukun, dezde-ke la viola konstituisaun, labele ukun ho arogante, labele konsidera ukun nu’udar oportunidade ida ba hadi’a moris, serve de’it interese grupu ki’ik ida liuhosi dalan foer alias Korrupsaun, Koluzaun no Nepotizmu (KKN). Ita hein...! 

Alkatiri ho nia Diverjénsia Polítika

Noemio Falcão

Diverjénsia polítika entre líder polítiku liuliu jerasaun tuan sira sukat la dook hosi temporada bailoron no udan, iha tempu ida fahe malu nune’e mos kazu kontráriu. Diverjénsia ida ne’e husik hela istória ida-idak nian iha ne’ebé foinsa’e sira buka atu aprende no hili tuir di’ak no so’e hirak ne’ebé a’at.

Kuaze fulan ida ona Governu Konstitusionál dahituk funsiona ho estatutu nu’udar governu minoritáriu, hatudu momos diverjénsia polítika entre lideransa sira hosi FRETILIN nu’udar partidu mais votadu, liuliu Sekretáriu Jerál, Marí Bin Amude Alkatiri ho Prezidente Partidu Libertasaun Populár (PLP), Taur Matan Ruak ho Prezidente CNRT, Kayrala Xanana Gusmão dook tebes.

Kona-ba “ukun”, FRETILIN halo kampaña maka’as iha eleisaun liu ba, katak, FRETILIN manan Xanana manan. Xanana ho oin midar de’it, afinál hafoin eleisaun Xanana la fó oin ba Alkatiri iha momentu ne’ebé susar tebes ba FRETILIN ho de’it kadeira 23 forma governu dahituk.

Taur Matan Ruak ne’ebé iha kampaña ho Alkatiri hateke malu matan sorin de’it, maibé Alkatiri deside halo koligasaun ho PLP hodi forma governu maibé la konsege tanba iha prosesu negosiasaun partidu rua ne’e lian la ida.

Jornada polítika hirak ne’e hatudu momos Alkatiri la hetan fatin no iha forsa ida ne’ebé metin hodi asegura nia ajenda polítika ho ró boot FRETILIN. Serake Comite Central FRETILIN (CCF) tenke halo hikas avaliasaun ba evolusaun polítika iha ne’ebé FRETILIN kontinua simu todan sé governu dahituk monu duni tanba laiha forsa maioria iha Parlamentu Nasionál?.

Hafoin estrutura governu lideradu Alkatiri simu posse dahuluk no daruak kompleta membru hamutuk 33, bloku opozisaun CNRT, PLP ho KHUNTO hala’o kedas reasaun hodi afirma governu alternativa hodi antisipa governu dahituk monu iha dalan klaran.

Senáriu ida ne’e fó ameasa boot tebes. Governu koligasaun FRETILIN ho PD tenke rekoñese laiha forsa maioria tanba sira ho de’it kadeira 30, inkuantu bloku opozisaun iha kadeira 35.

Hakarak ka lakohi, laiha fatin iha konstituisaun Repúblika Demokrátika Timor Leste (K-RDTL) atu minoria ukun ka kaer governu tanba iha artigu 109 kona-ba apresiasaun programa governu nian, bainhira Parlamentu Nasionál la aprova dala rua maka governu monu.

Xanana ho Taur la hatudu oin ba malu kleur duni ona, kuaze Taur nia mandatu tomak nu’udar Prezidente Repúblika, líder nain rua ne’ebé iha tempu rejisténsia konsidera malu hanesan maun ho alin, fila kotuk ba malu. Karik ne’e jogu polítika bonitu iha ne’ebé hakarak di’ak liu ba povu no rai ida ne’e?.

Hatudu dadauk CNRT ho PLP hamutuk iha Parlamentu Nasionál laiha buat ida mak taka sé mudansa polítika ida ne’e volante hosi Xanana ho Taur, tanba partidu rua ne’e idéntiku liu ho fígura líder karismátiku Xanana ho Taur. Ita hein...!

Hakraik-án

Hakraik-án, toman ema ida-idak nian. Hahú iha família ida, iha komunidade nia leet, hatudu iha sosiedade ein-jeral. Toman ida ne’e hatudu liuhosi asaun ema ida ba seluk sempre hetan resposta pozetivu iha objetuvu hotu.

Maske nune’e, la ema hotu ho hakraik-án nu’udar dalan úniku ba atinje objetivu ida. Baibain lia dadolin iha dalan barak liuba Roma.

Toman hakraik-án iha sosiedade Timor-Leste, lia feto-san-umane kuda metin doutrina respeitu, konta no tane malu laiha hún no rohan. Hakraik-án hahoris domin, iha ne’ebé oan ba bei-oan lahusik leet no nakfakar folin la’ek.

Liga toman ida ne’e ba ita nia situasaun polítika iha rai laran, timoroan hotu presiza tebes hakraik-án, buka hakuak malu, kahe kabas hodi hakat ho forsa iha tane no lori moris di’ak ba povu no nasaun. Nasaun ida ne’e sosa ho ruin ho raan sura ho folin karun tebes.

Governu dahituk forma tiha ona ho forsa FRETILIN – PD maske minoritáriu tanba sura kadeira 30 de’it iha uma fukun Parlamentu Nasionál, kompara ho opozisaun maioria CNRT – PLP no KHUNTO ho kadeira 35, maibé governu lideradu Primeiru Ministru, Marí Bin Amude Alkatiri eziste tanba hetan ona rekoñesimentu hosi Prezidente Repúblika, Francisco Guterres Lú Olo.

Marka istória foun ho governu monoritáriu iha ita-nia rain. Teória hakerek minoria submete ba maioria, maibé liga ho referénsia hatúr governu ida ne’e ho fi’ar-an tomak hosi bloku koligasaun FRETILIN-PD hodi hakat ba oin.

Situasaun ida ne’e, ne’ebé povu rasik mak hamosu nu’udar teste foun ba maturidade timoroan sira-nian liuliu líder polítiku sira-nian atu deskobre no fó solusaun hotu no hakat ho responsabilidade tomak.

Teste boot liuba destinu governu ida ne’e ho konfiansa tomak bainhira komunga ona toman hakraik-án, sei hatudu rejultadu bainhira aprejenta programa no orsamentu ba Parlamentu Nasionál.

Serake opozisaun sira la’ós tanba hanesan maioria submete ba minoria, maibé hothotu ho hakraik-án bele simu malu?, ka malisan arogánsia ema ida-idak nian maka sei hatohar no hamout intereses pesoal no grupu ki’ik ida nian. Ita hein...

 

Minoria Vs Maioria

Noemio Falcão

Realmente governu konstitusionál dahituk ne’ebé hahoris hosi partidu koligasaun FRETILIN ho PD hetan de’it kadeira 30. Inkuantu partidu opozisaun CNRT, PLP ho KHUNTO hetan kadeira 35.

Ne’e hatudu governu minotitáriu ne’ebé lidera hosi Primeiru Ministru, Marí Bin Amude Alkatiri, ladun estavel.

Opiniaun, krítika no análiza pro no kontra ba desizaun Prezidente Repúblika, Francisco Guterres ‘Lú Olo’ hafoin indijita Primeiru Ministru Marí Alkatiri, maka’as tebes iha sosiedade nia leet.

Hirak ne’ebé pro ba desizaun ne’e mai ho pensamentu ida ke mais importante maka formasaun governu la’o tarde ona povu hein governu foun hodi serví povu ho rai ne’e. Inkuantu hirak ne’ebé kontra konsidera desizaun Prezidente Repúblika nian ne’e falun ho interese partidáriu tanba Prezidente Repúblika nu’udar mos Prezidente FRETILIN.

Loos duni katak, Prezidente Repúblika molok foti desizaun ne’e halo ona konsulta ho partidu tolu ne’ebé hili dalan opozisaun, maibé serake Prezidente Repúblika tetu ho sériu duni kona-ba risku hosi governu minoritáriu?.

Liga ba konstituisaun RDTL, artigu 108, artigu 109, artigu 110, artigu 111 no artigu 112, konklui governu minoritáriu sei la dura to’o tinan lima tanba opozisaun maioritáriu bele vota kontra programa no orsamentu governu nian dala rua tutuir malu governu monu, nune’e mos opozisaun bele halo mosaun sensura iha Parlamentu Nasionál no risku ba eleisaun antisipada boot tebes.

Fi’ar katak partidu ho líder polítiku sira hotu liuliu hirak ne’ebé túr iha Parlamentu Nasionál tane aas interese estadu liu interese privadu ka grupu ki’ik ida nian, maibé tanba jogu polítiku bele iha fo’er kahur hodi atinje objetivu ida.

Ne’e dezafiu boot ida ne’ebé FRETILIN nu’udar partidu mais votadu ho nia aliadu PD, buka atu tetu no sukat progrma no orsamentu jerál estadu bainhira lori ba Parlamentu Nasionál hodi hetan aprovasaun. Partidu koligasaun tenke ho maneira aprosimasaun ne’ebé nakloke no onestu, soe tiha hahalok ego no arogánsia hodi konvense duni opozisaun.

Nota jogu ba okupa ukun hosi líder polítiku sira seidauk to’o nia rohan iha periodu ida ne’e. Maske partidu opozisaun sira liuliu CNRT nu’udar segundu mais votadu deklara abertamente sai opozisaun, maibé hatudu hela sinál hakarak ukun bainhira eleisaun ba Prezidente Parlamentu Nasionál, CNRT mós avansa nia kandidatu no hetan apoiu hosi PLP.

Halo polítika, kada minutu, oras ba loron ida ba seluk la hanesan. Maibé, sé hanesan FRETILIN rasik garante governu inkluzaun no insidénsia parlamnetar laiha garantia ida tanba laiha akordu formal ne’ebé kesi metin opozisaun nia apoiu ba governasaun ida ne’e.

Hirak ne’e hotu malisan demokrasia. Iha meius hotu bainhira tuir hela koridor, sidadaun hotu ho livremente halo polítika ho responsabilidade ba rai no povu nia di’ak. Ita Hein...

Labele Kán Ukun ho Arogánsia

Noemio Falcão

Normalmente nu’udar organizasaun polítika alias partidu polítiku nia objetivu prinsipál maka buka atu kaer ukun.  Eleisaun nu’udar meius ida atu partidu polítiku sira faan sira-nia planu no progrma nu’udar kompromisu polítiku hodi hetan fi’ar hosi povu.

Meius ida ne’e nu’udar prinsípiu demokrasia iha ne’ebé hatuur mós iha Konstituisaun Repúblika Demokrátika Timor Leste (KRDTL), obriga partidu polítiku sira tenke respeita povu nia desizaun liuhosi eleisaun. Katak, poder hosi povu eskolla sira-nia reprezentante hodi serví filafali povu.

Partidu lima, FRETILIN, CNRT, PLP, PD ho KHUNTO mak ultrapasa bareira hodi ba okupa kadeira 65 iha Parlamentu Nasionál. FRETILIN nu’udar partidu mais votadu hetan de’it kadeira 23 labele ukun mesak tanba la prienxe maioria simples ho kadeira 33. Inkuantu CNRT nu’udar partidu segundu mais votadu hetan kadeira 22. Tuir fali PLP hetan kadeira 8, PD hetan kadeira 7 no KHUNTO hetan kadeira 5.

Bazeia ba KRDTL artigu 106, FRETILIN mak iha direitu lidera prosesu formasaun governu, maibé kuaze fulan rua nia laran FRETILIN la konsege hetan nia aliadu hodi prienxe maioria simples (kadeira 33). FRETILIN hetan de’it PD halo koligasaun hamutuk kadeira 30.

Maske rejultadu hatudu la hetan maioria simples, maibé FRETILIN ho PD kontinua avansa ho governu minoritáriu no Prezidente Repúblika, Francisco Guterres Lú Olo indijita ona Primeiru Ministru ba VII governu maka Sekretáriu Jerál FRETILIN, Marí Bin Amude Alkatiri.

Desizaun Prezidente Repúblika nian ne’e hamosu pergunta boot, tanba la devia Prezidente Repúblika konkorda ho governu minoritáriu tanba KRDTL rasik (artigu 106) só hatete Prezidente Repúblika hili partidu ne’ebé manan ka hosi aliansa partidu sira ne’ebé iha nia ema barak iha parlamentu.

Ne’e hatudu VII governu ne’ebé hahoris hosi FRETILIN ho PD frajil bele monu bainhira de’it tanba laiha forsa iha Parlamentu Nasionál atu defende programa no Orsamentu Jerál Estadu (OJE).

Iha situasaun ida ne’e, FRETILIN ho PD mós la devia avansa ho governu minoritáriu, buka atu rekoñese laiha forsa atu garante destinu governu ho fuan boot buka atu konvense CNRT, PLP ho KHUNTO la ho arogánsia iha fahe poder atu evita eleisaun antisipada.

Hirak ne’e hotu tempu la’o dadauk no desizaun sira hatun ona hosi Prezidente Repúblika. Ne’e responsabilidade Prezidente Repúblika tanba prezidente rasik la fó garantia ruma katak sei la akontese eleisaun antisipada ho nia desizaun ne’ebé iha.

Nu’udar nasaun demokrátiku normal sé mosu eleisaun antisipada, maibé intermus Timor-Leste nu’udar nasaun foun prosesu ida ne’e só difikulta de’it prosesu dezenvolvimentu no lakon tempu atu halo mudansa ba povu nia moris hosi terus no susar.

Ita hein katak líder partidu polítiku hotu liuliu partidu lima ne’ebé hetan asentu parlamentar livremente halo polítika hodi atinje objetivu ukun, maibé buka atu kuidadu nafatin ho responsabilidade nu’udar timoroan atu garante povu no rai ne’e nia moris iha paz no estabilidade. Ita Hein...

Tranzisaun Jerasional iha Ibun Tutun

Noemio Falcão

“Halo nusa maka bele  garantia tranzisaun jerasaun tuan ba jerasaun foun, tanba ami ne’e tuur iha kadera to’o monu de’it maka buat ne’e akontese ka?, ami maka tenke ajuda kria kondisoes ba tranzisaun ida ne’e maka ha’u-nia preokupasa,” Alkatiri subliña ba Jornalista sira iha CCF, Segunda (11/09).

Loos duni, preokupasaun Alkatiri nian ne’e pertinente tanba hakarak ka lakohi nu’udar ema nia idade kontinua ba oin no iha loron ida husik mundu espesialmente Timor Leste nu’udar nasaun ida ke labele mate ona.

Tranjisaun jerasionál la’ós foin sai tópiku debates iha públiku maibé hahú kedas governu tranzisaun ONU nian iha Timor Leste maioria jerasaun foun mak involve iha mákina hotu governu tranjisaun no kontinua iha primeiru governu to’o agora.

Maske nune’e, realmente líder katuas alias jerasaun tuan sira nia influensia sei maka’as los. Direta no indiretamente líder katuas sira mak sei kaer xave. Partidu boot sira hanesan FRETILIN ho CNRT  kontinua lidera hosi líder katuas sira.

Ne’e la’ós tanba de’it líder katuas sira mak hakarak, maibé mos foinsa’e sira alias jerasaun foun sira mak ka’er metin katuas sira atu akompaña prosesu tranjisaun jerasional. Serake katuas sira tenke akompaña prosesu ne’e to’o bainhira? Realmente kuaze tinan 20 ona líder katuas sira la husik sira nia poder iha ukun.

Pozisaun Primeiru Ministru nu’udar xave importante hosi órgaun soberanu tolu seluk, Prezidente Repúblika, Parlamentu Nasionál no Tribunal.

Kargu ne’e eis Primeiru Ministru iha V governu, Xanana Gusmão entrega ba Rui Maria de Araújo ema hosi FRETILIN ho rajaun ida maka tranjisaun jerasionál la haree ba koor partidu. Durante jerasaun foun ne’e lidera VI governu kompleta tinan rua, maske mosu polémika kona-ba nia integridade, maibé enjeral susesu.

Serake jerasaun foun seidauk bele iha FRETILIN rasik atu asume pasta Primeiru Ministru ba periodu 2017-2022? Desizaun hotu CCF mak deside bajei mos ba estatutu FRETILIN nian katak, bainhira manan iha eleisaun no forma governu automátikamente sekretáriu jerál maka asume pasta primeiru ministru.

Fi’ar katak Alkatiri nu’udar jerasaun tuan maibé ka’er metin ba nia prinsípiu polítiku defende tranjisaun jerasionál, la’ós iha ibun tutun de’it laran hakarak ka’er metin ukun.  Ita Hein....

Xanana Luta, Ita?

Editór Noemio Falcão kaer liman ho Maun Boot Kay Rala Xanana Gusmão

Buat hotu Xanana. Xanana, Xanana, Xanana. Xanana halo funu ho nia povu manán funu, ema hotu goza. Ema di’ak ka a’at (hakarak ukun-an no lakohi ukun-an) mós goza ho livre tanba Xanana. Xanana aman ba povu no nasaun ne’e. Serake tenke Xanana nafatin luta? luta to’o bainhira? Oinsá sé Xanana laiha? Ita ba ne’ebé?.

Loron hirak liuba Xanana tenke semo ba rai liur hodi luta defende soberania tasi, iha ne’ebé luta foun ida ne’ebé timoroan sira ho esperansa kontinua tula responsabilidade ba Xanana hodi luta tanba fronteira marítima entre Timor-Leste ho Austrália seidauk klaru. Luta ida ne’e Xanana asumi ba vitória total rai no povu Maubere.

La naran karan, buat hotu Xanana. Xanana hiit ain sai hosi Dili, polémika mosu iha rai laran rame liuliu iha konteksu tomada posse ba deputadu sira lejislatura dahaat no formasaun governu konstitusionál dahituk.

Iha parte ida FRETILIN liuhosi nia Sekretáriu Jerál Marí Bin Amude Alkatiri hatete, tenke hein Xanana fila hosi rai liur maka foin hala’o serimónia tomada posse ba deputadu sira lejislatura dahaat; iha sorin seluk, FRETILIN rasik manda karta ba Parlamentu Nasionál husu adia serimónia tomada posse hodi fó tempu ba formasaun governu dahituk, maibé iha sikun seluk mos Prezidente Konsellu Diretiva Nasional (CDN) - CNRT, Dionisio Babo Soares, halo kontra atake hosi públiku liuliu rede sosiál hasoru sira-nia Prezidente, Xanana Gusmão, iha ne’ebé mosu polémika katak Xanana mak nu’udar fatór ne’ebé halo demora kestaun estadu nian.

Ita hotu la hatene Xanana nia hanoin no hakarak, maibé ita mos bele konsiente no tetu katak, sé ita hotu tau esperansa ba luta ne’ebé Xanana infrenta, la siknifika ita tuur iha fatin hodi adora de’it Xanana, no Xanana mós parese lakohi assuntu nasaun nian paradu tanba sein prezensa ninian.

Hein katak Xanana fila hosi rai liur la dehan “tanba sá imi hein ha’u?”. 

Realmete impaktu hosi tomada posse ba deputadu foun sira no formasaun governu tarde maka, lejislatura datoluk kontinua hala’o servisu maske konstituisaun fó mandatu tinan lima de’it, nune’e mos governu tenke nakfilak ba governu jestaun, iha ne’ebé membru governu sira labele foti tan desizaun polítika ruma. No iha kazu ne’e mos fó impaktu ba implementasaun planu no programa no ejekusaun orsamentu jerál estadu.

Realidade ida ne’e hatudu momós sinál líder tuan sira sei sai fatór determinante ba funsionamentu estadu RDTL. Tanba ne’e mos, fi’ar katak líder tuan sira mós konsiénte katak, iha momentu hirak ne’ebé sira sei iha labele husik leet de’it diverjênsia no interese polítika grupu ka pesoál, maibé buka atu hakbiit no fó kompeténsia no akompaña jerasaun foun sira atu kontinua lori povu no nasaun ne’e ba oin. Ita Hein...

Envolve Ukun & Batalla 2022

Tara talin bobar no kesi metin...Hotu-hotu tau Tara...Tara me'ik no kro'at hotu...Ita hein...!!!

Tribunál Rekursu (TR) offisialmente proklama ona rejultadu eleisaun parlamentar periodu 2017 – 2022 iha loron 01/08/2017. Rejultadu ne’e haktuir partidu lima (5) mak liu bareira hodi okupa kadeira 65 iha uma fukun Parlamentu Nasionál.

Rejultadu ne’e mós hakotu FRETILIN nu’udar partidu vensedór okupa kadeira 23, tuir fali CNRT okupa kadeira 22, PLP okupa kadeira 8, PD okupa kadeira 7 no KHUNTO okupa kadeira 5.  

Hosi total kadeira ne’ebé partidu lima ne’e hetan laiha partifu ida maka manan maioria absoluta, katak, hetan kadeira 33 ka 50+1 % hodi bele ukun mesak. Tanba ne’e, hakarak ka lakohi partidu lima ne’e atu forma governu tenke buka kolega hodi hetan forsa polítika iha Parlamentu Nasionál.

Konstituisaun RDTL artigu 106 haktuir katak, partidu ne’ebé manan ka hosi aliansa partidu sira ne’ebé iha nia ema barak iha parlamentu, mak sei hatudu primeiru ministru hafoin mak prezidente repúblika mak sei hili.

Hosi artigu ne’e obriga FRETILIN nu’udar partidu mais votadu buka aprosima ho partidu haat seluk hodi hetan forsa iha parlamentu no hatudu Primeiru Ministru ida atu Prezidente Repúblika bele hili. Maibé artigu ne’e mos loke dalan ba CNRT, PLP, PD no KHUNTO bele hamosu forsa polítika iha parlamentu no indika Primeiru Ministru hodi Prezidente Repúblika tetu no hili.

Hosi interpretasaun ba artigu 106 ne’e, obriga partidu lima ne’ebé hetan asentu atu halo negosiasaun ba kadeira iha governu no kontratu polítiku ne’ebé bele garante estabilidade governasaun durante mandatu tinan lima.

Funsionamentu normal iha nasaun demokrátiku, iha parlamentu nasionál iha forsa polítika rua, iha ne’ebé ida hahoris governu tenke defende planu no programa governu nian, no opozisaun nu’udar forsa ida ne’ebé halo kontrolu no kontra konseitu ne’ebé la refeleta ba interese komum.

Rejultadu justisa popular ne’ebé hatudu liuhosi eleisaun 2017 hatudu golpe hasoru líder polítiku timoroan sira tenke konsiente ona katak, povu hatene eskolla nia reprejentante ba kaer ukun, maibé mos povu hatene halo justisa durante ukun serví duni interese komum ka interese pesoál no grupu kiik ida.

Povu kontinua observa partidu polítiku sira hotu liuliu hirak ne’ebé agora reprejenta povu okupa kadeira ukun nian iha governu no parlamentu. Laiha dalan seluk asaun sa de’it maka ukun nain sira hatudu iha mandatu ida ne’e maka sei sei sai bala iha batalla 2022. Ita Hein....

 

Alkatiri Timoroan

Noemio Falcão

Comite Central FRETILIN (CCF) foti ona desizaun mantein Sekretáriu Jerál FRETILIN, Marí Bin Amude Alkatiri sai Primeiru Ministru ba VII Governu Konstitusionál tuir estatutu FRETILIN nian katak, bainhira manan iha eleisaun ba forma governu automátikamente Sekretáriu Jerál mak asume pasta Primeiru Ministru.

Tanba-sá FRETILIN seidauk forma VII governu? Pergunta ida ne’e kuaze fulan rua ona ema husu ba malu, la’ós de’it iha Dili, iha foho mos la tó ho akompaña de’it televizaun, rádio no jornal, maibé via telefone ba malu, liu rede sosiál, i bainhira ita husi Dili hala’o viazen ba foho sempre hasoru kedas pergunta ne’e hosi povu.

FRETILIN nu’udar partidu mais votadu oportunidade di’ak tebes kompara ho 2007 FRETILIN hela de’it ho naran. Iha momentu ne’ebá partidu hotu-hotu taka odamatan ba FRETILIN ikuas mai CNRT ho nia aliadu forma Aliansa Maioria Parlamentár (AMP) ukun durante tinan lima.

Durante negosiasaun ba formasaun governu, kuaze fulan rua ona FRETILIN lideradu Marí Bin Amude Alkatiri hasoru hotu keda partidu haat seluk, CNRT, PLP, PD ho KHUNTO ne’ebé ultrapasa bareira okupa kadeira iha Parlamentu Nasionál.

Iha semana kotuk FRETILIN konsege asina akordu koligasaun ho PD ho KHUNTO hetan kadeira 35. Ho forsa koligasaun ne’e lori ona Aniceto Guterres eleitu ba Prezidente Parlamentu Nasionál. Maibé tanba-sá seidauk bele forma VII Governu? até sé mak atu sai Primeiru Ministru de’it mos sei iha hela nakukun laran tanba koligasaun seidauk lori naran ba Prezidente Repúblika nomea.

“Ha’u iha direitu atu dehan konkorda ka la konkorda. Iha 2006 krize ne’e mos membru CCF hotu dehan ha’u kontinua nu’udar primeiru ministru, ha’u to’o uma, ha’u toba kalan-la toba, toba la dukur, dia seginte ha’u dehan ba prezidente, imi bele kastiga ha’u mas ha’u rejigna-án,” Alkatiri haktuir ba jornalista sira hafoin partisipa reuniaun CCF iha Sede CCF, Komoro, Dili, Domingu, (10/09). 

Prosesu formasaun governu normalmente iha país demokrátiku sira la’ós brinkadeira? Maibé iha kontekstu Timor Leste ba periodu ida ne’e FRETILIN demora fó impaktu mos ba Prezidente Repúblika Francisco Guterres Lú Olo nu’udar mos prezidente FRETILIN.

Públiku bele de’it halo análiza no komentáriu krítika Lú Olo nu’udar Xefe Estadu la devia husik de’it FRETILIN lori prosesu ne’ebé dada naruk tebes. Lú Olo tenke ezije nafatin ba FRETILIN iha seriedade i halo mos kontaktu ho partidu segundu mais votadu no partidu seluk tuir konstituisaun artigu 106 haruka. 

Iha prosesu ne’e mos Alkatiri tenke toma responsabilidade ne’ebé povu fó fi’ar atu labele demora bebeik formasaun governu i Alkatiri rasik nu’udar timoroan iha direitu romak ho livremente asume kargu Primeiru Ministru, maske iha públiku ema balun kestiona Alkatiri la’ós relijiaun katólika.

Realmente toleránsia relijiaun iha Timor Leste boot tebes, la’ós de’it tanba estadu fó rekoñesimentu mos ba loron boot katólika, musulmanu no relijiaun sira seluk, maibé povu rasik hatudu sira nia fuan boot nu’udar kriatura ne’ebé mai husi hún no abut ida, no nu’udar ema ne’ebé mai ho karaterítika sosiál.

Sai líder polítiku tenke brani infrenta jogu ho adversáriu polítiku. Nune’e mos tenke brani infrenta krítika moruk sira hosi públiku. Maibé tenke lori bola ba oin hasoru dezafius hotu, hetan atake no buka esforsu tomak hodi hetan rejultadu di’ak iha jogu ida. Ita Hein....

“Ukun Mesak La Dura”

Noemio Falcao

Formasaun Governu Konstitusionál dahituk (VII) seidauk serteja. FRETILIN nu’udar partidu mais votadu deklara ona halo koligasaun ho PLP ho KHUNTO maibé kuaze fulan ida ona partidu tolu ne’e seidauk prodús akordu koligasaun hanesan baze legál hodi la’o hamutuk durante tinan lima.

PLP ho KHUNTO rasik mós konkorda ona la’o hamutuk ho FRETILIN, maske PLP ho FRETILIN rasik iha diverjénsia komprimísiu polítiku iha kampaña eleitorál boot tebes. Iha kampaña PLP prefere liu dezenvolvimentu báziku ne’ebé povu sente direta no ameasa redús orsamentu ba mega projetu sira inklui projetu ZEESM ho Tasi Mane, inkuantu FRETILIN prefere kontinua mega projetu, iha ne’ebé nia alvu mos ba povu nia moris di’ak iha futuru.

Kazamentu polítiku partidu tolu ne’e, liuliu FRETILIN ho PLP sei hamosu hela dúvida iha públiku. Komentáriu no análiza balu sei hatete partidu rua ne’e sei la hetan akordu ida bainhira iha negosiasaun no ajustamentu programa polítikus.

Dúvida ba inserteja koligasaun ne’e bele de’it mosu tanba partidu tolu ne’e rasik seidauk iha plataforma koligasaun ne’ebé legál.

Líder boot partidu tolu ne’e rasik mos seidauk tuur hamutuk iha meza ida hodi deklara ba públiku, no ida-idak sei nanal toos hela só ho diplomásia polítika bainhira hatan ba jornalista sira kona-ba fahe pasta iha governu, nune’e mós kargu Primeiru Ministru ho estrutura meza iha uma fukun Parlamentu Nasionál sei iha hela nakukun laran.

Pior liután dúvida ba inserteja koligasaun FRETILIN, PLP ho KHUNTO, maka líder boot Sekretáriu Jerál FRETILIN, Marí Bin Amude Alkatiri Cs halo mós kontaktu ho Partidu Demokrátiku (PD) no deskuti mos akordu inkluzaun.

La’ós ne’e de’it, FRETILIN ko’alia mós ho CNRT maske partidu lideradu Xanana Gusmão ne’e deklara ona sai opozisaun liuhosi konferénsia nasionál. FRETILIN alias Alkatiri prefere liu ukun hamutuk atu gevernu labele nakdoko tanba Alkatiri rasik rekoñese esperiénsia ukun mesak hatudu ona la dura.

Hein katak líder polítiku partidu lima FRETILIN, CNRT, PLP, PD no KHUNTO tau a’as responsabilidade ne’ebé povu fó ona liuliu FRETILIN atu forma governu ida ne’ebé dura. Nune’e mós intermus intereses nasionál, opozisaun ida ne’ebé forte mos atu fó balansu ba ukun durante tinan lima.

Hirak ne’e hotu halai ba intereses partidu ida-idak nian. Polítika iha palku ko’alia midar, maibé iha kotuk sikat no falun ho intereses oioin. Ita Hein....

 

Malisan Demokrasia

Noemio Falcão

Demokrasia nu’udar sistema sosial no polítika estadu ka governu ne’ebé mai hosi povu no ba povu. Timor Leste nu’udar nasaun demokrátiku, iha ne’ebé iha lei no kustumi rasik hodi proteje direitu ema ida-idak nian.

Demokrasia mos iha dezafiu ne’ebé maske nasaun hirak uza sistema demokrasia nia sidadaun sira tenke infrenta nu’udar dezafiu boot maka direitu no dever ema ida-idak nian, iha ne’ebé dala barak ema goza la ho limitasaun.

Liga ba situasaun polítika iha rai laran, líder partidu polítiku sira liuliu partidu lima ne’ebé ultrapasa bareira ba okupa kadeira iha Uma Fukun Parlamentu Nasionál no ka’er ukun iha governu, asumi responsabilidade ne’ebé povu fó liuhosi eleisaun jerál hodi serví fila-fali povu la haree ba kór.

Nota líder polítiku sira hatudu maturidade hodi asumi responsabilidade ida ne’e. Lider katuas alias jerasaun tuan sira no líder foinsa’e alias jerasaun foun sira hatudu balansu iha ukun tuir duni povu nia hakarak.

Rejultadu eleisaun jerál liu ba ne’e povu fó mensajen ne’ebé líder polítika katuas ka foinsa’e tenke konsiénte katak Timor Leste ukun rasik a’an dala ida de’it, nu’udar ema iha loron ida husik mundu, ke presiza duni tranjisaun jerasionál.

Hatudu dadauk Prezidente Repúblika, Francisco Guterres Lú Olo nu’udar jerasaun tuan, Prezidente Parlamentu Nasionál, Aniceto Guterres jerasaun foun, Prezidente Tribunál Rekursu, Deolindos dos Santos jerasaun foun, no hein katak Primeiru Ministru iha VII governu ne’e jerasaun foun.

Polítika, CNRT ho PLP hili ona dalan ba opozisaun. Tenke tane nafatin prinsípiu sai opozisaun edukativu. Katak, nu’udar minoria hanesan organizasaun polítika sé iha karik dalan (celah) ruma maibé agora nu’udar  minoria tenke submete ba FRETILIN, PD ho KHUNTO. Ne’e hatudu malisan demokrasia.

Maske nune’e, partidu ida-idak tenke defende nia prinsípiu polítika nu’udar bukae ba eleisaun tuir mai. Tanba demokrasia minoria tenke submete ba desizaun maioria nian, maibé la signifika opozisaun la ho ruin.

Fi’ar katak CNRT ho PLP nia lider boot Xanana Gusmão ho Taur Matan Ruak bele lori bero rua ne’e ho kuidadu iha intervensaun hotu nu’udar opozisaun iha Parlamentu Nasionál. Nune’e mos nu’udar jerasaun katuas uza oportunidade ida ne’e hodi tulun prosesu hotu ne’ebé di’ak ba povu no nasaun nia di’ak liu.

Malisan demokrasia, minoria submete ba maioria. Ne’e hatudu maioria forte, maibé mos minoria mos tenke forte. Bom Trabalho ba Ukun Nain Sira. Ita Hein...

 

FRETILIN iha ‘Perigu’

Noemio Falcão

Kuriozidade públiku ba formasaun VII governu maka’as liután bainhira partidu lima, FRETILIN, CNRT, PLP, PD no KHUNTO seidauk fó resporta klaramente halo koligasaun hodi indika Primeiru Ministru foun.

FRETILIN nu’udar partidu mais votadu iha momentu ida ne’e susar tebes forma governu lalais bainhira Xanana Gusmão liuhosi konferénsia CNRT foti desizaun sai opozisaun. Inkuantu iha konjuntura polítika CNRT ho FRETILIN liuliu lider boot Xanana ho Alkatiri iha relasuan ne’ebé metin hahú kedas 2013, até iha 2015 Xanana konvida ema FRETILIN nain haat tama iha governu kaer pasta importante inklui Primeiru Ministru.

Loos duni, polítika ne’e la’ós estatistika. Iha ne’ebé FRETILIN alias Alkatiri tau laran metin los ba Xanana, ikus mai Xanana hadook-án derepente de’it. Serake Xanana triste duni ho derota ne’ebé CNRT hetan hosi rejultadu eleisaun lakon kadeira ualu? Ou tanba Xanana lakohi hamutuk ho FRETILIN forma governu tan tinan sanulu liu ona tempu ba FRETILIN ukun ho partidu seluk? Ou bele ho intensaun seluk ba interese nasionál? Importante povu labele sai vítima iha senáriu hirak ne’e hotu.

Kaer ba konstituisaun RDTL artigu 106, iha ona desizaun ne’ebé bele uza hanesan desizaun jurisprudénsia bainhira iha tinan 2007, Prezidente Repúblika, José Ramos Horta hili Aliansa Maioria Parlamenta (AMP) ne’ebé forma hosi CNRT, PD, ASDT, PSD no UNDERTIM, maske FRETILIN iha momentu ne’eba mak manan maioria votus.

Ho rejultadu eleisaun 2017 ne’e, hakarak ka lakohi, FRETILIN tenke buka negosia maka’as ho partidu haat seluk ne’ebé liu bareira parlamentar hodi forma VII governu ne’ebé iha forsa polítika iha Parlamentu Nasionál alias tenke iha kadeira 33 ka 50+1%.

Haree ba ajenda tentativa posse ba membru Parlamentu Nasionál iha loron 22 no posse ba membru governu foun iha 25 ka 26 fulan ne’e, maka tempu kursial tebes ba partidu lima liuliu FRETILIN forma governu, ke presiza lori tempu hodi hetan akordu koligasaun no estabelese estrutura governu foun no hili membru governu sira.

Hein katak FRETILIN nia konvite ba partidu haat seluk, horiseik hahú Alkatiri Cs hasoru malu ona Kalbuadi Cs bele hetan sinál roman ba formasaun governu hafoin hato’o rejultadu reuniaun ho Alkatiri ba Xanana Gusmão.

Karik iha forma seluk ba formasaun VII governu, maibé tempu ba partidu lima ne’ebé okupa uma fukun Parlamentu Nasionál, tantu ukun no opozisaun, ida-idak tenke aposta konsisténsia polítika iha ne’ebé sai rejerva hodi enfrenta julgamentu popular tuir mai.

Hirak ne’e hotu la boot liu interese povu rai lulik ne’e nian. Malisan demokrasia hahoris partidu ida-idak ho idolojia la hanesan maibé tenke tane a’an nafatin povu no nasaun nia interese liu interese individu no grupu ida nian. Ita Hein....!