Vítima iha Batalla Eleisaun Antesipada

Noemio Falcão

Eleisaun parlamentar 22 Jullu 2017 marka istória partidu lima mak hetan asentu iha Parlamentu Nasionál, inklui FRETILIN ho votu 168.480 hetan kadeira 23, CNRT ho votu 167.345 hetan kadeira 22, PLP ho votus 60.098 hetan kadeira 8, PD ho votu 55.608 hetan kadeira 7 no KHUNTO ho votu 36.546 hetan kadeira 5.

Nu’udar partidu votu barak liu, iha momentu ne’eba FRETILIN iha direitu tomak tuir konstituisaun RDTL, artigu 106, forma governu dahituk ho prinsípiu maioria parlamentar (mínimu kadeira 33) hodi garante estabilidade governativa durante mandatu tinan lima. Maibé saida mak akontese, FRETILIN avansa de’it ho governu minoria ho koligasaun ho PD hamutuk kadeira 30, inkuantu opozisaun CNRT, PLP ho KHUNTO sura hamutuk kadeira 35.

Governu dahituk lideradu Primeiru Ministru, Mari Bin Amude Alkatiri la hetan forsa maior iha Parlamentu Nasionál, ikus mai rejulta programa governu hetan rejeisaun husi opozisaun sira, nune’e tuir konstituisaun artigu 86, kompeténsia Prezidente Repúblika, liu fulan neen disolve parlamentu no hakat ba eleisaun antesipada.

Eleisaun antesipada loke mos dalan ba partidu hirak ne’ebé la liu bareira pursentu haat (4%). Nune’e, bainhira Prezidente Repúblika, Francisco Guterres ‘Lú Olo’ dekreta loron eleisaun parlamentar antesipada, partidu hamutuk haat no koligasaun haat mak ba rejistu iha Tribunál Rekursu hodi partisipa iha batalla ida ne’e.

Partidu haat ne’ebé hakat mesak inklui FRETILIN, PD, PR ho PEP. Inkuantu koligasaun antes eleisaun hamutuk haat, inklui Aliansa Mudansa ba Progresu (AMP) kompostu husi partidu CNRT, PLP ho KHUNTO; Forum Demokrátiku Dezenvolvimentu (FDD) kompostu husi UDT, PUDD, FM no PDN; Movimentu Sosiál Demokrata (MSD) kompostu husi CASDT, PSD, PST no PDC; Movimentu Dezenvolvimentu Nasionál (MDN) kompostu husi UNDERTIM, APMT, PTD ho MLPM.

Iha kampaña, sukat husi masa, FRETILIN ho AMP hatudu forsa boot rua ne’ebé mak iha posibilidade boot hadau malu forma governu daualu. PD la hatudu ambiente iha kampaña rame hanesan iha eleisaun jerál 2017, justru FDD nia massa duni malu ho PD. Inkuantu PEP, PR, MSD, MDN malirin loos.

Husi observasaun ida ne’e, hatudu FRETILIN ho AMP sei bele hadau malu ba forma governu daualu, no posibilidade boot ba PD ho FDD sai hanesan feto bonita iha prosesu formasaun governu bainhira FRETILIN ho AMP la atinji maioria parlamentar.

Sé mak sei sai vítima iha eleisaun parlamentar antesipada ida ne’e?, Ita hein eleisaun parlamentar antesipada 12 Maiu 2018. Partidu lima ne’ebé hetan asentu iha eleisaun 2017, ida ne’ebé mak sei aumenta kadeira, ida ne’ebé mak kadeira menus.

Forsa foun haree hosi massa iha kampaña, posibilidade boot liu mak FDD bele ultrapasa bareira bainhira partidu haat ne’ebé envolve iha FDD mantein ho votus eleisaun 2017 hamutuk 39.837.

Povu mak nain ba ukun! Tanba ne’e, liuhosi eleisaun povu mak sei hili partidu ka koligasaun ho líder polítiku ne’ebé trasa planu ho programa ne’ebé hato’o iha kampaña, hodi ba kaer ukun tuir mandatu konstitusionál. Ita hein...!

Programa Vs Istória

Noemio Falcão

Kampaña eleitorál iha eleisaun hirak liu ba trend ho liafuan Indonézia “Romantis” alias rombongan makan geratis. Ne’e katak, masa ne’ebé partisipa iha kampaña la preokupa ho partidu ka koligasaun ne’ebé de’it mak ba halo kampaña. Importante hahan iha, simu faru gratuita, no enxe mina ba karreta ho motorizada gratuita.

Kampaña iha eleisaun antesipada, ita observa partidu no koligasaun balu sériu ba kampaña, maibé mos iha sikun seluk ita nota líder partidu sira hatudu jestu sira hanesan halo komédia, nune’e mos barak liu konta istória partisipasaun funu ba libertasaun nasionál no luta ba moris di’ak povu nian.  

Loos duni katak iha kampaña partidu polítiku sira tenke faan sira nia programa hodi hetan konfiansa husi povu, maibé natureja kampaña eleisaun antesipada dadauk ne’e partidu no koligasaun balu la foku ko’alia programa iha palku leten.

Fenómena ida ne’e hatudu, mosu dadaun istória ho versaun la hanesan husi líder polítiku sira, ida nega fali ida seluk nune’e mos ida seluk. Ne’e hatudu katak, istória Timor nian ba partisipasaun timoroan sira nian ba funu husi kada ema sei malahuk hela iha jerasaun foun sira nia oin.

Istória ho versaun ida ne’ebé foin mak mosu maka, Prezidente Koligasaun Aliansa Mudansa ba Progresu (AMP), Xanana Gusmão bainhira kampaña iha Munisípiu Kovalima, haktuir, Ramos Horta ho Marí Alkatiri la’ós fundador FRETILIN. Tuir Xanana, Abílio Araújo ho nia grupu ida ne’ebé la inklui Ramos Horta ho Mari Alkatiri ba aprende Marsista iha Portugál mak fundadór lolo’os FRETILIN.

Husi versaun istória ida ne’e hatudu kontráriu tebes ho istória verbal antes ne’ebé haktuir Ramos Horta ho Alkatiri mak fundadór FRETILIN.

Husi versaun istória Xanana haktuir ne’e mos bele nota intensaun Xanana la konsidera FRETILIN nu’udar símbolu rejisténsia ne’ebé merese timoroan sira hotu nia respeitu bainhira ba halot iha muzeium rejisténsia, iha ne’ebé hatudu finalidade ba funu kontra okupasaun Indonézia hakotu ho referendu ho uza bandeira CNRT (Conselho Nacional Resisténcia Timorense).

Kuaze semana ida ona kampaña AMP nian, tempu barak liu Xanana ho Taur ladun fokus ba programa koligasaun nian, iha palku leten barak liu líder rua ne’e haktuir istória prosesu naruk luta ba libertasaun nasional, no haktuir mos istória luta ba manan soberania tasi lideradu Xanana Gusmão nu’udar Xefe Negosiadór Prinsipál Fronteira Marítima.

Entretantu FRETILIN, Mari Alkatiri nu’udar Sekretáriu Jerál FRETILIN hetan apoiu hosi Ramos Horta ho Abílio Araújo. Iha palku, líder nain tolu ne’e foku ba programa polítiku FRETILIN nian, maibé mós gasta mós tempu hodi konta istória funu nian no kontra atake personál husi Xanana Gusmão ho Taur Matan Ruak no pelu kontráriu.

Laiha justifikasaun husi drama polítika hirak ne’e, haree husi masa forsa polítika rua ne’e kuaze hanesan. Estratéjia kampaña ho modelu tama sai uma alias dor to dor la’o namanas. Depende ba povu iha klima kampaña eleisaun antesipada konsumu liu modelu kampaña tama sai uma no iha palku leten ho konta istória, ka foku ba programa polítika partidu no koligasaun nian ne’ebé kuaze hanesan de’it, no sempre aprejenta durante periodu kampaña sira iha eleisaun sira liubá. Ita hein...!

Desizaun iha Povu

Noemio Falcão

Finalmente iha kampaña loron dahuluk hatudu povu mantein maturidade iha partisipasaun iha organizasaun polítika. Partisipasaun militantes no simpatejante ba partidu no koligasaun ida-idak iha baze ho entusiazmu. 

Eleisaun antesipada la’ós eleisaun normal tuir mandatu ne’ebé hatur iha konstituisaun, eleisaun ida ne’e espesial tebes ba povu nu’udar nain ba ukun atu halo hikas desizaun liuhosi eleisaun atu nune’e bele harii fali lejizlatura dalima no governu daualu ne’ebé metin durante tinan lima.

Eleisaun 2017 liuba, povu la fó votu maioria ba partidu ida manan maioria hodi forma governu ida ne’ebé metin, ne’e hatudu desizaun povu nian ne’ebé obriga lider partidu polítiku sira atu tuur hamutuk hodi konsentra ba dezenvolvimentu nasionál, maibé saida mak akontese, lider sira kontinua fila kotuk ba malu, ikus mai mosu eleisaun antesipada ba-dahuluk iha Timor-Leste nia istória.

Será que eleisaun antesipada nu’udar prosesu normal ida, resposta bele dehan, sim! Tanba Timor-Leste nu’udar nasaun demokrátiku ida hanesan mos nasaun seluk iha mundu, maibé eleisaun antesipada mos ita bele konsidera hanesan malisan ida husi lala’ok demokrasia iha nasaun foun hanesan Timor-Leste ne’ebé devia lider polítiku sira tenke konsiente ona katak, presiza tebes tau forsa hamutuk hodi harii governu ne’ebé metin hodi konsentra ba ukun ho di’ak liu tan.

Lisaun aat ne’ebé ita tenke so’e tiha tanba apriende hosi empase polítika durante fulan hirak liuba, hahú husi prosesu formasaun governu dahituk maka, hahalok arogánsia no egoista, hodi nune’e buka nakloke ba malu ho fuan boot, no respeitu malu tuir kultura nahe biti boot.

Simu ka la simu, hakarak ka lakohi, eleisaun antesipada, direitu apsolutamente iha povu nia liman. Durante fulan ida hahú ona iha loron 10/04/2018, partidu polítiku haat inklui FRETILIN, PD, PR no PEP; no kolisaunsaun haat inklui AMP, MDN, FDD ho MSD tun ona ba kampo kampaña eleitoral.

Ho fi’ar metin katak, durante periodu kampaña, laiha provokasaun husi lider polítiku sira, nune’e mos sei laiha violénsia entre militantes no simpatejante sira.

Lider polítiku sira fokus de’it ba programa polítika no garante konfiansa tomak ba povu ho governu daualu ne’ebé hamriik metin hodi konsentra ba dezenvolvimentu nasionál.   

Povu rona no fihir ho didi’ak durante tempu kampaña hodi nune’e bele halo desizaun liuhusi eleisaun iha loron 12 fulan-Maiu 2018, ho livre no loos.

Hili partidu polítiku ka koligasaun, hanesan mos hili ema alias líder polítiku ne’ebé sa’e ba kaer ukun ho metin no ho matenek no esperiensia tomak implementa programa ne’ebé durante kampaña promesas ona ba povu. Ita hein...!

Xanana & Responsabilidade

Noemio Falcão

Povu timor liuliu iha Dili bainhira simu Xefe Negosiadór Prinsipál Xanana Gusmão iha loron 10 Marsu 2018, lori ita ba hanoin hikas bainhira eis Komandante in Xefe FALINTIL ne’e sai hosi komarka Cipinang-Jakarta hafoin hetan kapturasaun iha tinan 1992 iha Lahane, Dili.

Iha momentu ne’eba situasaun difísil tebes iha rai laran, Xanana iha komarka la túr hakmatek no kontinua halo apelu hodi dudu no fó nafatin espíritu luta ba libertasaun nasionál. no ikus mai hetan duni rejultadu timoroan sira ukun rasik-án, no Xanana fila mai Dili, povu tomak simu nu’udar eroi boot.

Iha fulan neen ba kotuk, situasaun polítika iha rai laran sai manas tebes, maske la fó impaktu ba estabilidade nasional, maibé afeta ba situasaun ekonomia no sosial povu kiik sira nian. Mezmu nune’e, luta timor oan sira nian ba soberania tasi lideradu Xanana kontinua la’o namanas iha rai liur.

Xanana hatudu duni nia espíritu kontinuador no inspiradór ne’ebé sai referénsia ba jerasaun foun sira, la baruk, la kole no la hanoin fo’er iha nia luta hodi atinji de’it interese privadu, grupu ka interese ne’ebé afavor de’it ba partidu polítiku, maske atualmente Xanana nu’udar Prezidente Partidu CNRT.

Maske nune’e, ema balun dúvida no preokupa bainhira Xanana to’o iha Dili, ba halo fali konferénsia ba imprensa iha Sede Partidu CNRT. Resposta ba dúvida no preokupasaun ida ne’e, la’ós de’it Xanana, maibé mos governu liuliu Primeiru Ministru, Marí Bin Amude Alkatiri, iha ne’ebé misaun ne’ebé Xanana hala’o reprejenta estadu no povu tomak nia interese.

Loos duni katak hirarkiamente Xanana tenke submete ba governu tanba liuhosi Konsellu Ministru mak atribui misaun espesial ne’e ba Xanana, maibé mos governu labele abandona hikas responsabilidade ne’e até Primeiru Ministru rasik dehan la informadu kona-ba akta akordu fronteira marítima molok Timor-Leste ho Austrália asina iha Nova Iorke.

Ne’e hatudu laiha komunikasaun ne’ebé di’ak entre ekipa negosiador ho governu liuliu Primeiru Ministru nu’udar xefe governu. Nune’e mos hatudu Ministériu Negósiu Estranjeiru no Kooperasaun ladun pro-ativu iha prosesu ida ne’e.  

Hakarak ka lakohi, gosta ka la gosta, prosesu naruk no todan ba defende soberania tasi timor, timoroan tomak nia hakarak ne’ebé lidera duni husi Xanana mak hetan ona rejultadu pozetivu.

Maske nune’e, hein katak Prezidente Repúblika, Francisco Guterres ‘Lú Olo’ nu’udar aman nasaun no Primeiru Ministru sei hetan relatóriu hosi ekipa negosiador fronteira marítima. Nune’e mos relatóriu sei fó sai ba públiku atu ema hotu bele hatene transparénsia hosi servisu negosiador durante ne’e iha rai liur.

Hirak ne’e hotu nu’udar responsabilidade ida ne’ebé Xanana nu’udar Xefe Negosiador Prinsipál ba Fronteira Marítima hatudu nanis ona bainhira ho responsabilidade tomak lidera funu ba libertasaun nasionál. Ita hein...!

“Amigo, amigo. Negócio à parte”

Asinatura akordu fronteira marítima entre Timor Leste ho Austrália ne’ebé hala’o iha sede Nasoins Unidas, iha loron tersa (6/03) Marsu 2018, tuku 17:00 oras Nova Iorke, tempu hanesan iha Dili loron kuarta (7/03) tuku hitu dader, nu’udar momentu istóriku importante tebes ba nasaun viziñu rua ne’e.

Negosiasaun ba fronteira marítima nu’udar assuntu polítika ida, iha ne’ebé Timor-Leste lideradu hosi Xefe Negosiador Fronteira Marítima, Xanana Gusmão konsege túr hamutuk ho nasaun jigante Ausrália, hakotu ona prosesu boot fronteira marítima.

Maske nune’e, sei iha tan prosesu ne’ebé nasaun rua sei kontinua túr hamutuk hodi deskuti maka mina matan ida ne’ebé hanaran greater sunrise, ne’ebé iha ona kontratu antes ho kompañia exploradór sira to’o tinan 2022.

Tuir estimasaun, mina matan greater sunrise bainhira halo produsaun sei hetan osan hamutuk biliaun U$ 50.  Montante ida ne’e hatudu valor ekonomia iha mina matan ne’e boot tebes. Maibé husi parte tolu (Timor-Leste, Austrália no Kompañia explorador sira) seidauk hetan konkluzaun kona-ba prosesu explorasaun, iha ne’ebé antes ne’e opsaun rua hosi Austrália no hetan suporta hosi kompañia sira maka halo explorasaun iha tai leten ou dada kadoras ba Darwin-Austrália, inkuantu Timor Leste defende dada kadoras mai rai rai maran Timor-Leste.

Timoroan sira lideradu Xanana Gusmão kontinua defende makaas atu mina matan ne’e dada mai rai maran Timor-Leste, atu nune’e bele fó benefísiu ekonómikamente ba timoroan sira direta no indiretamente.

Maske nune’e, Timor-Leste nu’udar nasaun kiik no foun iha mundu, dala ruma nasaun boot sira kaiseru ho kompañia exploradór sira hateke ho matan sorin de’it no buka atu halo manobra hotu hodi ita monu ba sira nia jogu polítika no ekonomia. 

Tanba ne’e, timoroan sira tenke hatudu brani infrenta laliu tan defende direitu no dignidade nu’udar nasaun soberanu.

Tribunal arbitrajen nu’udar tribunal internasional ba tetu no diside disputa sira ne’e. Tanba ne’e, loos duni katak Timor-Leste ho Austrália túr hamutuk ona hodi defini fronteira marítima, maibé kestaun ekonomia, hanesan provérbiu Portugués ida subliña “Amigo, amigo. Negócio à parte”. Katak, Timor-Leste ho Austrália nu’udar viziñu ne’ebé la’ós ona bolu kolega maibé maun ho alin. Maibé ita sei bele lori malu ba tribunál bainhira laiha konklusaun ba asuntu balun entre ita.

Ita hein prosesu tuir mai, ho timoroan sira-nia hamutuk intermus polítika hodi nune’e bele hametin unidade no hamutuk ba enfrenta batalla ida ne’ebé ema seluk bele halo matak ho manobra sira envolve timoroan balu ne’ebé fé la metin. Ita hein...!

Fronteira Marítima Mak Ne’ebé?

Tuir ajenda, Timor-Leste ho Austrália asina akordu fronteira marítima iha loron 6 Marsu 2018, iha Nova Iorke. Sekretáriu Jerál Organizasaun Nasaun Unidas (ONU), António Guteres ho Prezidente Komisaun Konsiliasaun, Peter Taksøe-Jensen mak sai sasin ba momentu istóriku ida ne’e.

Akordu ne’e asina hafoin durante tinan hirak nia laran hahú hosi tinan 2002, nasaun viziñu rua ne’e asina uluk akordu ho naran CMATS (Certain Maritime Arrangements in the Timor Sea), iha ne’ebé iha akordu ne’e termina Timor-Leste ho Austrália sei ko’alia fronteira marítima iha tinan 50, sura hosi akordu ne’e asina, maibé tanba iha artigu balun iha akordu ne’e fó dalan bainhira Timor-Leste ho Austrália la halo explorasaun ba greater sunrise maka entre nasaun rua bele husu halo renovasaun ka hakotu akordu ne’ebé ninia prazu to’o Maiu 2015. Tanba ne’e, Timor-Leste inisia prosesu ne’e ikus mai nasaun rua konkorda hakotu akordu ne’e iha inísiu tinan 2017.

Nune’e, Timor-Leste liuhosi apoiu Nasaun Unidas nian ho kriasaun komisaun konsiliasaun, obriga nasaun rua tuur hamutuk hodi halo negosiasaun foun ba termnasaun fronteira marítima. Prosesu ne’e hosi parte Timor-Leste nian lidera hosi Xefe Negosiador Fronteira Marítima, Xanana Gusmão.

Kuaze tinan ida nia laran, hahú iha inísiu hafoin eleisaun jerál parlamentar 2017, Xanana Gusmão ho nia ekipa luta makaas hodi defende luta foun ne’ebé determina mos Timor-Leste nu’udar nasaun soberanu ne’ebé tenke hetan independénsia total iha fronteira rai, tasi no lalehan.

Loos duni katak haree hosi prosesu hotu ne’ebé la’o no hosi solusaun ba disputa entre Timor-Leste ho Austrália, hatudu espesialmente ba Timor-Leste nu’udar nasaun foun dala ida tan marka istória, iha ne’ebé istórikamente kompara ho nasaun balun iha mundu hetan independénsia tinan barak ona maibé seidauk rejolve fronteira marítima.

Timor-Leste iha viziñu ho nasaun jigante rua, Austrália ho Indonézia. Ho Austrália fronteira tasi de’it hakotu dadauk, no ho Indonézia fronteira rai falta de’it pursentu rua, fronteira tasi seidauk maibé iha tasi laran ladun iha mina no gas.

Maske nune’e, fronteira marítima entre Timor Leste ho Austrália ne’ebé marka ona iha ajenda ba asina, públiku liuliu povu Timor-Leste rasik seidauk hatene loloos fronteira marítima entre Timor Leste ho Austrália ne’e dada hosi liña ne’ebé konkorda ona iha tinan 1997 entre Indonézia ho Austrália, ka dada metru oinsá.

Lójikamente hosi disputa fronteira marítima entre nasaun ida ho nasaun seluk iha ne’ebé defende liña klaran, siknifika sukat hosi rai maran Timor-Leste to’o liña klaran púrsentu 50, nune’e mos sukat hosi rai maran Austrália ba liña klaran pursentu 50.

Tanba ne’e, hein katak, sé akordu ne’e refleta duni liña klaran ne’ebé iha no tuir duni prinsípiu legál sira iha lei UNCLOS nian maka riku soin iha tasi okos inklui mina matan greater sunrise ne’ebé bolu ho naran JPDA (Joint Petroleum Development Area) perténsia hotu ba Timor-Leste. Ita hein...!

Responsabilidade Estadu ba Ema Estranjeiru

Triste tebes ho akontesimentu ema oho mate Indiadu ida ne’ebé passa vida nu’udar komersiante ka fa’an dosi (terang bulan) iha Aldeia Nubadak, Suku Bidau, Postu Administrativu Na’in Feto, Munisípiu Dili. Indianu ne’e hola feto timoroan ida no sira iha ona oan hamutuk na’in-tolu.

Akontesimentu ne’e husik hela todan boot tebes ba família matebian liuliu inan faluk ho oan ki’ak sira ne’ebé tinan sei kiik hotu. Família matebian nian iha rai Índia rona notísia ne’e moruk tebes. Lakon ema la hanesan ho lakon animal ida.

Akontesimentu hanesan (ema estranjeiru mate tanba hetan oho no torturasaun) mosu ona iha tinan hirak liuba joven ida oho mate patraun ida iha otél Beach Garden, Bebonuk, nune’e mos estranjeiru ida mate tanba motivu la klaru iha Kolmera.

Kazu hirak ne’e tenke sai ona sampel ka referénsia ba autoridade seguransa no justisa sira atu toma atensaun ho sériu. Iha ne’ebé Timor-Leste nu’udar nasaun foun, iha ne’ebé tenke konsiente katak mudansa moris nu’udar ema iha mundu ne’ebé nakloke, halo movimentasaun ema husi fatin ida ba seluk hodi buka moris. Ne’e hatudu iha realidade timoroan barak ba buka moris iha nasaun seluk. Nune’e mos ema estranjeiru sira bele buka moris iha rai laran bainhira kumpri regra nasaun nian.

Relasaun nu’udar ema moris iha sosiedade iha mundu laiha freonteira, regras nasaun ida-idak nian difini nasionalidade nu’udar estatutu iha nasaun ka rejiaun ida nian ho kultura sira la hanesan, maibé nu’udar ema, durante peregrinasaun iha mundu iha sékulu ikus ne’e la’ós ona hela metin de’it iha knua ka nasaun ida nia moris ba.

Realmente ema estranjeirus iha Timor-Leste kontinua aumenta hosi tinan ba tinan tanba oportunidade negósiu no seguransa, lei no justisa ne’ebé bele garante mós sira nia movimentasaun iha rai laran. Direitu ida ne’e nu’udar direitu internasionál ida ne’ebé estadu Timor-Leste mos tenke toma responsabilidade no konsidera ho sériu tanba nasaun seluk mós iha lei hodi fó garantia ba timoroan sira ne’ebé buka moris iha ema nia rain.

Juntamente ho dezenvolvimentu ne’ebé iha, atu garantia impaktu pozetivu no negativu sira, estadu Timor-Leste tenke pro ativu liután atu aplika regras no halo levantamentu dadus ho sériu ba ema estranjeiru sira iha rai laran, tantu hirak ne’ebé mai ho objetivu servisu iha seitor públiku no privadu, viajen nu’udar turista no vizita família sira, nune’e bele akompaña no prevene akontesimentu inesperadu sira.

Maske parte seguransa ho justisa seidauk sériu tau atensaun ba kestaun hirak ne’ebé temi iha leten, maibé ba kazu oho Indianu ne’e, Polísia Nasionál Timor-Leste (PNTL), Munisípiu Dili merese hetan parabéns hosi públiku tanba halo ona kapturasaun ba autór prinsipal ne’ebé halo asaun brutal ne’e. Hein katak prosesu ba kazu ne’e tenke hakotu tuir lei. Ita hein...!

Kadoras Mai Beasu

Tuir ajenda, Xefe Negosiadór Fronteira Marítima, Kayrala Xanana Gusmão ho nia ekipa, durante loron haat nia laran hahú iha loron segunda (19 to’o 22/02/2018) reuniaun ikus iha Kuala Lumpur, Malázia ho kompañia ConocoPhilips nu’udar komapñia explorador mina matan greater sunrise.

Timoroan tomak tau esperansa boot ba ekipa negosiador atu hetan rejultadu di’ak iha luta foun ida ne’e hasoru nasaun jigante Austrália ho kompañia explorador sira.

Hafoin halo demostrasaun sira liuba, iha semana ikus ne’e igreja katólika mos hola parte selebra misa hodi husu tulun Maromak, eroi sira fila ona ba mundu seluk, rai no fatuk lulik fó roman no kbiit tomak hodi manan soberania tasi.

Benefísiu ril ne’ebé Timor-Leste sei hetan bainhira kadoras mina dada mai rai maran Beasu maka timoroan sira barak maka servisu iha produsaun mina no baze supply iha Suai.

La’ós ne’e de’it, produsaun mina iha rai maran fó impaktu di’ak tebes ba roda ekonomia rai laran liuliu iha setór ne’ebé povu sente direta maka agrikultura.

Produsaun rai laran mos bele aumenta ho badinas agrikultor sira nia no injeta maka’as hosi governu atu fasilita aihan lokal ba servisu nain sira. Hosi ne’e povu agrikultor sira sei hakiak animal, karau, manu, bibi, kuda, fahi, no produtu lokal seluk inklui modo no foos lokál.

Atu atinje metas ida ne’e governu tenke defini programa nasionál ida iha ne’ebé tenke servisu interministeriál liuliu envolve ministériu agrikultura, ministériu komériu no indúsria, ministériu turismu nu’udar fatór importante iha ne’ebé servisu hamutuk ho povu, no hosi ne’e ita bele brani ona hapara impostasaun ba nesesidade hirak ne’ebé ita rasik bele prodús no responde ona ba nesesidade iha merkadu rai laran.

Governu mak inisia espíritu ida ne’e tanba dadauk ne’e povu agrikultór sira loos duni katak sira la konsidera agrikultór nu’udar profisaun ida ka setór ida ne’ebé importante tebes atu fila moris a’at ba di’ak, maibé ita labele bosok ita nia a’an katak, agrikultor sira mos presiza kbiit no polítika ne’ebé di’ak hosi governu hodi dezenvolve seitora agrikultura.

Governu tenke rekoñese katak, polítika povu kuda governu sosa, ne’e polítika ida ne’ebé kapas tebes maibé la efetivu. Hatudu governu laiha vontade ne’ebé sériu tanba saida mak akontese liuba, produtu hirak ne’ebé povu kuda governu sosa balu seluk lae, hirak ne’ebé sosa mos budu to’o dodok de’it iha armajen.

Ikus mai, lema “povu kuda, governu sosa” nakfilak ba “povu kuda, governu sa’e” ka “povu kuda, governu karau” tanba povu hanesan kuda iha ne’ebé governu joga karau hodi sa’e povu hanesan kuda sai vítima tanba kuda sasan ho kbiit raik la folin iha merkadu.

Hein katak ho tulun Maromak, eroi no rai lulik Timór nian, Timor-Leste sei atinji duni mehi dada kadoras mai rai maran tasi mane, Beasu, Vikeke tuir planu ne’ebé iha ona. No mehi hotu ne’ebé iha ba ekonomia povu kiik sira-nian no ba dezenvolvimentu nasionál bele iha mudansa di’ak liu tan. Ita hein...!

Tulun Xanana Cs

Dala ida tan luta ba soberania tasi Timór besik to’o nia rohan. Tuir ajenda, loron 19 to’o 22 fulan-Fevereiru 2018, Xefe Negosiadór Fronteira Marítima, Xanana Gusmão ho nia ekipa hala’o reuniaun ikus ho kompañia exploradores ConocoPhilips, iha Kuala Lumpur, Malázia.

Reuniaun ikus ho ConocoPhilips ne’e diskute liu kona-ba kadoras minarai (pipeline greater sunrise) dada mai rai maran Timor-Leste iha Beasu, Vikeke, ka dada ba Darwin Austrália ka halo explorasaun iha tasi laran.

Hakarak ka lakohi, gosta ka la gosta, hatudu tiha ona iha realidade, igreja nia kontribuisaun direta no indireta maka’as tebes ba libertasaun nasional.

Funu boot durante tinan naruk hasoru nasaun jigante hanesan Indonézia la fasil, iha ne’ebé timoroan sira laiha kbiit iha materiál funu nian, maibé saida mak akontese hafoin tinan 24 nia laran, Timor-Leste manan funu hasoru Indonézia.

Luta foun ne’ebé agora la’o namas mezmu la ho forsa maibé ho matenek, iha ne’ebé timoroan sira agora infrenta dadauk maka luta hasoru nasaun jigante Austrália ba manan soberania tasi.

Oras ne’e daudauk Xefe Negosiador Fronteira Marítima, Xanana Gusmão ho nia ekipa infrenta hela negosiasaun foun hafoin nasaun rua konkorda invaliza tiha akordu tuan hanaran Certain Maritime Arrangements in the Timor Sea (CMATS).

Ajenda marka ona ba loron 19 to’o 22 fulan ne’e nu’udar reuniaun ikus ho kompañia explorador ConocoPhilips, iha Kuala Lumpur, Malázia.

Dala ida tan iha prosesu ida ne’e Igreja katólika Timór kontinua hatudu solidariedade nu’udar Nai Lulik Timoroan organiza dadauk misa iha timor laran tomak hodi husu harohan ba Maromak hodi fó kbiit no roman ba ekipa negosiadór lideradu Xanana Gusmão atu hetan vitória iha batalla ida ne’e.

Xanana Gusmão iha loron hirak ikus ne’e manda mensajen ba veteranu sira atu hola parte mos no timoroan tomak atu husu tulun Maromak nian no forsa natureja Timór nian hodi tulun liuliu bele atinje duni mehi timoroan tomak nian ho eroi sira atu dada kadoras mai rai maran Timor-Leste. Ita hein...

Labele “Mandul”

Fenómena polítika ne’ebé durante fulan neen liu mosu iha uma fukun bele kompara karik hanesan jogu futebol iha kampu ne’ebé depende ba ekipa ne’ebé maka hatene joga ho tátika hotu ne’ebé uza maka bele sai manan nain.

Sura hosi loron 22 Jullu 2017 to’o loron 22 Janeiru 2018, kompleta fulan neen funsionamentu lejislatura dahaat ne’ebé lideradu Prezidente Parlamantu Nasionál, Aniceto Guterres ne’e kude’ik, no labele kontinua la’o tan ba oin tanba Prezidente Repúblika, Francisco Guterres Lú Olo disolve ona iha loron 26 Janeiru 2018 no hakat ba eleisaun antesipada tanba konsidera “krize institusionál” iha uma lulik povu nian ne’e.

Konsikuénsia hosi disolusaun ne’e afeta direta ba governu dahituk ne’ebé lidera hosi Primeiru Ministru, Marí Bin Amude Alkatiri mos labele kompleta tinan lima, tanba la hetan forsa maior iha Parlamentu Nasionál hodi garante estabilidade governativa.

Maske nune’e, bazeia ba artigu 100, disolusaun Parlamentu Nasionál la prejudisial ba subsistensia mandatu deputadu sira nian too bá parlamentu nia reuniaun ba-dala uluk bainhira liu tiha eleisaun subsekuente sira, maka kaer ba artigu 102, hahú loron kinta (08/02), deputadu sira estabelese komisaun permanente.

Artigu 102 haktuir iha pontu dahuluk katak, komisaun permanente halo servisu nafatin iha periodu ne’ebé Parlamentu Nasionál remata hela, iha intervalu sesaun nomós iha kazu selu-seluk previstu iha konstituisaun.

Nune’e, deputadu sira lidera hosi Prezidente Parlamentu Nasionál hili tiha ona sekretáriu nain rua ba komisaun permanente, iha ne’ebé Bloku Aliansa ba Mudansa no Progresu (AMP) nia pakote úniku maka manan iha votasaun iha sorumutu dahuluk komisaun permanente ne’e.

Maske iha diskusaun mosu presepsaun la hanesan entre bloku AMP ho bloku koligasaun FRETILIN ho PD, maibé, haktuir iha iha artigu 102 ne’e iha pontu datolu katak, komisaun permanente nia kna’ar maka, akompaña servisu sira governu nian nomós administrasaun nian; koordena servisu sira Komisaun Nasionál nian; promove konvokasaun Parlamentu Nasional nian; prepara no organiza sesaun sira Parlamentu Nasional nian; autoriza deslokasaun Prezidente Repúblika nian iha rai laran; dirije relasaun sira husu Parlamentu Nasional nomós parlamentu no instituisaun análogas paizes seluk nian no autoriza deklarasaun estadu de sitiu nian no estadu emerjensia nian.

Ho kompeténsia ne’ebé komisaun permanente iha, fiar katak deputadu hamutuk 29 ne’ebé reprejenta hosi FRETILIN nain 10, CNRT nain 10, PLP nain 4, PD nain 3 no KHUNTO deputadu nain 2, ne’e labele “mandul” alias la produtivu, maibé tenke ejerse sira nia funsaun ho sériu iha periodu tránzisaun ida ne’e, hatudu nafatin funsionamentu órgaun estadu sira iha periodu tránzisaun nia laran, kontinua tau matan ba ejekusaun orsamentu duodésimu ne’ebé governu dahituk utiliza, nune’e mós halo aprovasaun no tau matan ba ejekusaun orsamentu ba realizasaun eleisaun antesipada. Ita hein...!

 

Governu Mai Dura!

Forsa polítiku sira ne’ebé sei enfrenta batalla iha eleisaun antesipada hahú dadauk halo konsolisaunsaun, tama sai uma alias dor to dor, hasa’e bandeira iha fatin-fatin, balun hatun bandeira seluk hasa’e fali ida no pelo kontráriu.

Maske Prezidente Repúblika seidauk dekreta loron ba eleisaun antesipada, no tribunál rekursu seidauk loke rejiztrasaun ba koligasaun no partidu polítiku sira, maibé realmente partidu FRETILIN, CNRT, PLP, PD, KHUNTO no FDD (Frenti Dezenvolvimentu Demokrátiku) hatudu daudauk sira-nia aan.

Husi partidu hirak ne’e, partidu CNRT, PLP ho KHUNTO offisialmente lansa ona sira nia pozisaun koligasaun antes eleisaun no difini ona naran ba koligasaun ne’e “Aliansa ba Mudansa no  Progresu / AMP”.

Inkuantu FRETILIN ho PD ne’ebé hamutuk ba forma governu dahituk to’o agora seidauk difini klaru sira nia estatutu atu hakat ho koligasaun antes eleisaun ka depois de eleisaun. No FDD kompostu hosi partidu lima ne’ebé la liu bareira iha eleisaun liuba deklara avansa ba eleisaun antesipada.

Klima polítika iha batalla iha eleisaun antesipada ne’e sei la hanesan ho eleisaun jerál sira akontese iha Timor-Leste iha era liberdade nia laran. Líder polítiku sira tun ba baze sei hatudu liman tun sa’e hodi hadau simpatia povu nian ne’e nu’udar polítika fo’er.

Rejultadu eleisaun iha loron 22 Jullu 2017 tenke sai lisaun ba líder polítiku sira, tanba hatudu momos sé líder polítiku sira konsidera palku kampaña nu’udar ponte ne’ebé sira halo ho povu nia votus hodi atinji objetivu ba ukun.

Loos duni katak, objetivu partidu polítiku atu kaer ukun nu’udar reprejentante povu tomak nian, maibé tenke ukun ho onestu no tuir programa ne’ebé refleta ba realidade povu no nasaun nian ho onestidade.

Hein katak polítiku sira bele iha diverjénsia polítika maibé hanoin ida de’it ba povu no nasaun nia moris di’ak, hakribi violénsia, so’e ódiu vingansa no komunga de’it lisan hosi jogu polítika adversáriu la’ós inimigu.

Nune’e mós fi’ar katak, povu nafatin fó sira nia komtribuisaun ba di’ak rai ne’e liuhosi kontinua hakat ba sentru votasaun hodi hili filafali ukun nain sira ne’ebé ho matenek boot no esperiénsia hodi reprejenta ba ukun ne’ebé di’ak liu.

Partidu ne’ebé de’it maka hetan konfiansa hosi povu iha festa demokrasia ba-dala ida ne’e, hateke ba kotuk nu’udar lisaun ida hodi loke laran ba malu, so’e liafuan kroat no hahalok arogánsia hodi hamutuk nu’udar timoroan harii governu ida ne’ebé dura durante tinan lima ho foku ba dezenvolvimentu nasionál. Ita hein...!

Vong Vs Alkatiri

“Ha’u suspende ona, ha’u mak manda iha ne’e, no governu ne’e iha xefe ida de’it, la’ós rua ka tolu. Ha’u dehan suspende akordu ne’e, tanba hakarak haree uluk lei, tanba saida maka akontese iha governu ida ne’e tenke tuir lei, suspende signifika mos hapara tiha akordu ne’e,” Primeiru Ministru, Marí Bin Amude Alkatiri afirma lia hirak ne’e relasiona ho akordu ne’ebé Ministru Turizmu, Manuel Vong asina ho empreja Hama Tomo ho Double Six, ne’ebé atu halo investimentu iha atividade jogu ho otél iha Timor-Leste.

Situasaun ida ne’e hatudu malorek xefe governu ho nia membru governu la lian ida asina akordu sira investimentu iha Timor-Leste, pior liu atividade jogu sira ne’ebé la sees hosi atividade seluk ne’ebé kontra bandu no nia influénsia maka’as tebes ba problema ekonomia no sosial povu rai joven ida ne’e.

Sé los maka iha interese iha prosesu hirak ne’e, lia loos sei la mosu hanesan milagre bainhira laiha investigasaun ne’ebé sériu no justu hosi autoridade kompetente sira.

Fi’ar katak Vong la viola rasik nia prinsípiu ne’ebé nia hatudu durante ne’e. Katak, desizaun ne’ebé nia foti la’ós tanba ho interese fo’er maibé tanba prioridade nu’udar parte ida fó benefísiu ba estadu liuhosi kobra taxa sira no bele hamenus dezempregu bainhira atividade ne’e involve mos servisu nain timoroan sira.

Iha polémika ne’e Ministru Vong defende a’an ho rajaun asina akordu ne’e bazeia ba dekretu lei 37/2017 ne’ebé ko’alia kona-ba kompeténsia Ministériu Turizmu atu fo lisesnsa no halo fiskalizasaun ba aitividade Turizmu.

Sé nune’e, mosu pergunta boot ho Primeiru Ministru nia impedimentu ne’e, serake akorsu ne’ebé Ministru Vong ho nia Vise Rui Menezes asina ne’e falta koñesimentu ba xefe governu? Ka Primeiru Ministru iha hanoin pozetivu ba jogus sira ne’ebé governu anterior legaliza ona.  Katak, bainhira jogu foun governu legaliza tan bele hamate fali jogu hirak ne’ebé la’o tiha ona.

Hein katak Primeiru Ministrui ho nia Membru governu sira hotu ho polémika ne’e hatudu ba públiku servidór sira dala ruma halo kontra malu ba desizaun sira hanesan ne’e tanba tau a’as preokupasaun interese estadu nian liuliu ba moris di’ak povu ho nasaun nian.

Husu nafatin ba autoridade seguransa atu kontinua halo koordenasaun hodi halo nafatin kontrolu ba atividade ilegál sira. Nune’e mós buka atu investiga ukun nain sira ne’ebé halo desizaun bele mós favorese ba nia interese privadu no grupu ida nian. Ita hein...!

Hahú, Hatutan no Hakotu

Noemio Falcão

Luta ba libertasaun nasionál la’ós buat fasil ida, iha ne’ebé lori tinan naruk nia laran, sosa ho sofrimentu oioin, mate no ruin naklekar iha rai pedasuk ida ne’e nia leten, ikus mai atinji duni objetivu ida ne’ebé ho mos tulun forsa natural no Maromak, termina duni iha tinan 1999.

Durante tinan atus-haat-resin iha koloniál portugués no kontinua ho okupasaun tinan ruanulu-resin-haat, povu Timór la hakmatek. Ho kbiit tomak kontinua luta, husi tempu ba tempu ho estratéjia tomak, hahú kedas hosi luta hasoru kolonial portugués no duni invozór sai hosi rai Timór, ho objetivu ida de’it maka “Liberta Pátria, Liberta Povu”.

Prosesu todan boot ida ne’e, jerasaun foun sira tenke buka hatene atu sai referénsia ba luta foun ba defende dignidade povu maubere no intereses nasionál sira ba moris di’ak iha futuru ne’ebé laiha rohan.

Kontinuador ba luta naruk ba libertasaun pátria no povu iha timoroan sira-nia liman rasik, ba oin iha responsabilidade jerasaun foun sira-nian.

Estadu rekoñese ona Loron 3, fulan-Marsu nu’udar loron espesiál ba veteranu no kombatente libertasaun nasionál. Selebrasaun loron ida ne’e iha tinan ida ne’e fó hanoin hikas ba timoroan tomak atu halo reflesaun ba sá di’ak no aat, moruk no midar ne’ebé ita ultrapasa ona, no ba oin saida mak tenke halo ba moris di’ak povu no nasaun joven ne’e nian.

Ita hotu hatene katak luta ba libertasaun nasionál tenke atinje estatutu nu’udar nasaun soberanu, tenke kompleta soberania rai, tasi no lalehan. Tanba ne’e, mezmu ita atinje ona soberania rai, maibé soberania tasi no lalehan seidauk atinje pursentu atusida (100%).

Timor-Leste nu’udar illa kiik ida ne’ebé iha kedas viziñu ho nasaun jigante Austrália no Indonézia nia leet, hakarak ka lakohi ita buka atu sai belun di’ak ho nasaun rua ne’e, maibé ketan tasi no lalehan, ita tenke ko’alia ho firmeza hodi kontinua defende ita-nia direitu tuir lei internasionál.

Luta foun ida ne’e kontinua ezije timoroan tomak nia prontidaun, veteranu sira ne’ebé sei moris tenke hatudu nafatin vontade luta ho kbiit tomak ba jerasaun foun sira, iha ne’ebé unidade nu’udar fatór importante ida atu tau hamutuk forsa matenek nian hodi manán batalla sira ba povu ho nasaun nia dignidade no moris di’ak.  

Notísia furak ne’ebé timoroan hotu espera hela liderasaun Xanana Gusmão, Timor-Leste ho Austrália asina hikas akordu ba delimitasaun fronteira marítima, iha loron 6 Marsu 2018, iha Nova Iorke ho sasin hosi Sekretáriu Jerál Nasaun Unidas nian.

Maibé, hein katak, ho unidade nasionál no matenek ne’ebé timoroan sira iha sei atinje tan mehi dada kadoras mina mai rai maran Timor-Leste hodi fó moris di’ak ba povu no halais dezenvolvimentu nasionál.

Veteranu sira mak ita-nia mata dalan, dada jerasaun foun sira tuir dalan ne’ebé hatudu tiha ona iha tempu rejisténsia. Dalan ne’ebé jerasaun ba jerasaun sei kaer metin bainhira ita manán kompletamente soberania rai, tasi no lalehan.

Selebrasaun loron veteranu sira-nian, ho fi’ar metin nu’udar loron reflesaun dala ida tan ba hametin hikas unidade nasionál. Ita hein...!

Deputadu Sira Kontinua Servisu Tuir Artigu 102

Noémio Falcão

Fenómena polítika ne’ebé durante fulan neen liu mosu iha uma fukun bele kompara karik hanesan jogu futebol iha kampu ne’ebé depende ba ekipa ne’ebé maka hatene joga ho tátika hotu ne’ebé uza maka bele sai manan nain.

Sura hosi loron 22 Jullu 2017 to’o loron 22 Janeiru 2018, kompleta fulan neen funsionamentu lejislatura dahaat ne’ebé lideradu Prezidente Parlamantu Nasionál, Aniceto Guterres ne’e kude’ik, no labele kontinua la’o tan ba oin tanba Prezidente Repúblika, Francisco Guterres Lú Olo disolve ona iha loron 26 Janeiru 2018 no hakat ba eleisaun antesipada tanba konsidera “krize institusionál” iha uma lulik povu nian ne’e.

Konsikuénsia hosi disolusaun ne’e afeta direta ba governu dahituk ne’ebé lidera hosi Primeiru Ministru, Marí Bin Amude Alkatiri mos labele kompleta tinan lima, tanba la hetan forsa maior iha Parlamentu Nasionál hodi garante estabilidade governativa.

Maske nune’e, bazeia ba artigu 100, disolusaun Parlamentu Nasionál la prejudisial ba subsistensia mandatu deputadu sira nian too bá parlamentu nia reuniaun ba-dala uluk bainhira liu tiha eleisaun subsekuente sira, maka kaer ba artigu 102, hahú loron kinta (08/02), deputadu sira estabelese komisaun permanente.

Artigu 102 haktuir iha pontu dahuluk katak, komisaun permanente halo servisu nafatin iha periodu ne’ebé Parlamentu Nasionál remata hela, iha intervalu sesaun nomós iha kazu selu-seluk previstu iha konstituisaun.

Nune’e, deputadu sira lidera hosi Prezidente Parlamentu Nasionál hili tiha ona sekretáriu nain rua ba komisaun permanente, iha ne’ebé Bloku Aliansa ba Mudansa no Progresu (AMP) nia pakote úniku maka manan iha votasaun iha sorumutu dahuluk komisaun permanente ne’e.

Maske iha diskusaun mosu presepsaun la hanesan entre bloku AMP ho bloku koligasaun FRETILIN ho PD, maibé, haktuir iha iha artigu 102 ne’e iha pontu datolu katak, komisaun permanente nia kna’ar maka, akompaña servisu sira governu nian nomós administrasaun nian; koordena servisu sira Komisaun Nasionál nian; promove konvokasaun Parlamentu Nasional nian; prepara no organiza sesaun sira Parlamentu Nasional nian; autoriza deslokasaun Prezidente Repúblika nian iha rai laran; dirije relasaun sira husu Parlamentu Nasional nomós parlamentu no instituisaun análogas paizes seluk nian no autoriza deklarasaun estadu de sitiu nian no estadu emerjensia nian.

Ho kompeténsia ne’ebé komisaun permanente iha, fiar katak deputadu hamutuk 29 ne’ebé reprejenta hosi FRETILIN nain 10, CNRT nain 10, PLP nain 4, PD nain 3 no KHUNTO deputadu nain 2, ne’e labele “mandul” alias la produtivu, maibé tenke ejerse sira nia funsaun ho sériu iha periodu tránzisaun ida ne’e, hatudu nafatin funsionamentu órgaun estadu sira iha periodu tránzisaun nia laran, kontinua tau matan ba ejekusaun orsamentu duodésimu ne’ebé governu dahituk utiliza, nune’e mós halo aprovasaun no tau matan ba ejekusaun orsamentu ba realizasaun eleisaun antesipada. Ita hein...!

Lú Olo Hakotu ka Hanaruk?

Ilustrasaun

Prezidente Repúblika, Francisco Guterres ‘Lú Olo’, anúnsia tiha ona nia desizaun ba situasaun polítika iha rai laran, iha loron 26 Janeiru 2018. Desizaun ne’e Lú Olo foti tanba situasaun polítika iha rai laran hatudu inserteja, iha ne’ebé afeta maka’as ba setór seluk ne’ebé liga direta ba povu nia moris iha paz no hakmatek.  

Loos duni, realidade hatudu durante fulan neen nia laran hafoin eleisaun jeral iha loron 22 fulan-Jullu 2017, líder polítiku sira ne’ebé hetan fi’ar liuhosi partidu lima iha uma fukun Parlamentu Nasionál la konsege tuur hamutuk hodi forma governu ida ne’ebé dura durante mandatu tinan lima.

Prosesu ba formasaun governu ne’ebé lidera diretamente hosi Sekretáriu Jerál FRETILIN, Marí Bin Amude Alkatiri hetan de’it apoiu hosi Partidu Demokrátiku (PD) hodi la hetan forsa maior iha parlamentu tanba partidu rua ne’e iha de’it kadeira 30 (FRETILIN 23, PD 7), iha ne’ebé opozisaun CNRT (22), PLP (8) ho KHUNTO (5) domina ho kadeira hamutuk 35.

Lú Olo iha oportunidade ne’e haktuir iha konstituisaun RDTL, artigu 86, alinea F, disolve Parlamentu Nasionál hodi hakat ba eleisaun antesipada nu’udar opsaun ne’ebé tuir nia ideal liu atu hakotu inserteja ka impasse polítika iha Timor-Leste.

Desizaun ne’e kontráriu tebes ho objetivu hakotu inserteja ka impasse polítika bainhira Lú Olo la aslera dekreta loron eleisaun antesipada.

La’ós fasil, realiza eleisaun antesipada, marka istória ba dahuluk iha nasaun joven ne’e. Fiar katak Lú Olo tetu hotu ona konsikuensia hotu hafoin nia hola desizaun ne’ebé haree ba realidade polítika iha Timor Leste, to’o governu dahituk ona maibé eleisaun jerál foin dala ba-dala haat.

Ne’e hatudu governasaun dala tolu liuba la liuhosi eleisaun, iha ne’ebé Prezidente Repúblika sira liu ba hola desizaun sira ho sira-nia kapasidade rasik iha ne’ebé bele asegura governasaun ida tuir mandatu atu konsentra tempu ba dezenvolvimentu nasionál.

Iha kazu ne’e, Lú Olo nu’udar Prezidente Repúblika ne’ebé akompaña di’ak prosesu ba formasaun governu dahituk ate nia kansela nia viazen sira ba rai liur tanba situasaun polítika rai laran.

Maske nune’e, simu ka la simu, hakarak ka lakohi, desizaun Lú Olo nian nu’udar Xefe Estadu iha ona, iha ne’ebé hatudu inkapasidade líder sira nian iha kontekstu “hamutuk” simu mensajen povu nian liuhosi rejultadu eleisaun ba ukun hamutuk nian.

Timor-Leste presiza tan líder karismátiku ka konvensional atu halibur diverjénsia polítiku hotu iha situasaun ne’ebé estadu devia foku ba dezenvolvimentu nasional, liuliu ukun na’in sira tenke onestu katak liberdade ne’ebé hetan husi fakar raan, tempu agora la’ós oportunu ba jogu polítiku ba interese pesoál ka grupu ida nian. Ita hein...!

Lú Olo Defende Sé?

Noémio Falcão

Artigu 74 defini iha alinea dahuluk katak, Prezidente Repúblika mak Xefe Estadu, símbulu no garantia independênsia nasional no unidade Estadu nian ho funsionamentu regular instituisaun demokrátika sira.

Husi artigu ne’e hatudu Prezidente Repúblika, Francisco Guterres Lú Olo sei labele defende interese individu, grupu, rasa ka partidu polítiku ida nein FRETILIN mezmu nia mai hosi partidu istóriku ne’e nu’udar Prezidente FRETILIN.

Tanba ne’e, xave ba hakotu impasse polítika ka inserteja polítika dadauk iha Timor Leste, iha Prezidente Lú Olo nia liman.

Opsaun hotu ne’ebé durante ne’e sai debates iha públiku, inklui opsaun tolu ne’ebé Ramos Horta haktuir ba Jornalista sira hafoin deskuti ho Prezidente Lú Olo katak, dahuluk, bloku Aliansa Maioria Parlamentar fó apoiu ba governu dahituk hodi bele hala’o ona servisu ba povu no nasaun, opsaun daruak, liu hikas hosi diálogu ho partidu koligasaun FRETILIN ho PD, nune’e mos partidu sira hosi opozisaun CNRT, PLP no KHUNTO atu hahú hikas prosesu foun ba formasaun governu daualu maibé lidera nafatin hosi FRETILIN nu’udar partidu mais votadu.

Lo’os duni katak Prezidente Lú Olo maka sei foti desizaun ida husi opsaun hotu ne’ebé iha, maibé dala diálogu tenke efetivu inisia hosi Prezidente Lú Olo, nune’e mos Prezidente ladun hatudu nakloke tanba devia Prezidente kaer ba artigu 90 halo konsultasaun ba konsellu estadu hodi hetan imput barak liu hariku estratejia no ikus hetan desizaun ne’ebé ema hotu bele satisfas liuliu ba rai no povu nia di’ak nu’udar nasaun soberanu ida.

Artigu 90 haktuir kona-ba konsellu estadu Konsellu Estadu mak órgaun konsulta polítiku Presidente Repúblika nian, ne’ebé Prezidente rasik mak prezide.

Halo parte Konsellu Estadu mak, Ex-Prezidente Repúblika sira ne’ebe la’os destituídu; Prezidente Parlamentu Nasional nian; Primeiru-Ministru; Rai-nain lima eleitu hosi Parlamentu Nasional ho harmonia tuir prinsípiu  reprezentasaun proporsional, iha períodu kona-ba durasaun legislatura nian,  ne’ebé la’ós membru orgaun soberania nian; Rai-nain lima foti hosi Prezidente Repúblika, iha períodu kona-ba durasaun nian mandato nian, ne’ebe la’os membrus orgaun soberania nian.

Hein katak Prezidente Lú Olo hanesan promete ona iha kampaña eleitoral katak, mezmu nia kandidatu hosi FRETILIN maibé nia sai Prezidente Repúblika ba povu tomak.

Promesas hirak ne’e la signifika tenke sai fali opozisaun ba FRETILIN rasik, maibé desizaun ne’ebé povu hotu hein hosi Prezidente maka tuir de’it kompeténsia ne’ebé hakerek ona iha Konstituisaun RDTL. Ita hein...!

Kaleidoskópiu Forsa Polítika Rua iha Batalla Durante Fulan Neen

Edisaun Timor Post, 26 Janeiru 2018

DILI—Loron sesta (25 Janeiru 2018), tuku 10:00 OTL, Prezidente Repúblika, Francisco Guterres ‘Lú Olo’, anúnsiu ba públiku nia desizaun kona-ba impasse polítika iha Timor-Leste.

Durante fulan neen, mosu forsa polítika rua iha Timor-Leste, iha ne’ebé forsa polítika hosi bloku koligasaun FRETILIN – PD ne’ebé forma governu dahituk no forsa bloku Aliansa Maioria Parlamentar (AMP) nu’udar opozisaun kompostu hosi CNRT, PLP no LHUNTO.

Timor Post relembra istória impasse polítika, ne’ebé durante fulan neen iha Timor-Leste dada komunidade tomak ninia antensaun, hodi ikus mai tenke hetan intervensaun deretamente hosi Prezidente Repúblika, Fransisco Guterres ‘Lú-Olo’.

Desizaun ba hakotu impasse polítika ne’e Prezidente Repúblika foti bazeia ba Konstituisaun RDTL, artigu 86 kona-ba kompeténsia ba órgaun sira seluk. Iha ne’ebé disputa ka tensaun polítika ne’ebé mosu, entre parlamentu ho governu ke dada naruk durante fulan neen ona.

Rejultadu eleisaun jeral 22 Jullu 2017 hatudu istória moruk ida ba líder polítiku timoroan sira.  Hafoin Tribunal Rekursu ofisialmente legaliza rejultadu eleisaun iha loron tersa, 01 Agostu 2017, partidus polítiku ne’ebé hetan asentu iha Parlamentu Nasionál labele ukun mesak.

Partidu lima ne’ebé hetan asentu iha Parlamentu Nasionál, FRETILIN hetan votus 168.480 (29,7%) ho kadeira 23, CNRT hetan votu 167.345 (29,5%) ho kadeira 22, PLP hetan votu 60.098 (10,6%) ho kadeira 8, PD hetan votu 55.608 (9,8%) ho kadeira 7, no KHUNTO hetan votu 36.547 (6,4%) ho kadeira 5.

Hosi rejultadu ne’e, bazeia ba Konstituisaun RDTL, artigu 106, FRETILIN nu’udar partidu votus barak liu iha direitu ba forma governu dahituk.

Durante prosesu negosiasaun ba formasaun governu, Sekretáriu Jerál FRETILIN, Marí Bin Amude Alkatiri mak lidera diretamente prosesu ida ne’e. Iha momentu ne’eba FRETILIN define konseitu tolu ba formasaun governu dahituk mak hanesan, governu koligasaun, inkluzaun no insidénsia parlamentar.

Rejultadu fofoun hosi negosiasaun ne’e, FRETILIN la’o hamutuk ho PLP no KHUNTO. Maibé tanba la konkorda malu iha fahe kadeira ukun nian, iha ne’ebé FRETILIN hakarak lidera hodu Parlamentu ho Governu, eseptu Taur Matan Ruak mak bele lidera  Parlamentu. Maibé tanba PLP hakarak dudu Fidelis Magalhães ba Prezidente Parlamentu Nasionál, maka FRETILIN lakohi hodi ikus mau líder hosi partidu rua ne’e lakon kontaktu ba malu até soe malu iha dalan klaran.

La to’o ba iha ne’e de’it, prosesu negosiasaun ne’e kontinua la’o, FRETILIN avansa fali ho koligasaun, hamutuk ho Partidu Demokrátiku (PD) ho KHUNTO. Sura hamutuk partidu tolu ne’e nia kadeira hamutuk 35 no konsege manan iha eleisaun ba Prezidente Parlamentu Nasionál.

Maibé, koligasaun ida ne’e mos tohik iha dalan klaran la ho rajaun ne’ebé klaru bainhira atu hakat ba nomeasaun Primeiru Ministru hodi forma governu tanba KHUNTO haksoit sai ho problema iha kompozisaun membru governu.

Maske nune’e, FRETILIN ho PD avansa nafatin ho governu ho estatutu governu minoritáriu lideradu Primeiru Ministru, Marí Alkatiri ne’ebé nomea hosi Prezidente Repúblika, Francisco Guterres ‘Lú Olo’.

Iha nomeasaun ba Primeiru Ministru, Marí Alkatiri, Prezidente Repúblika, Francisco Guterres ‘Lú Olo’, rasik konsidera governu dahituk ne’e frajil hela tanba la hetan maioria parlamentar. Iha momentu ne’eba Lú Olo subliña, normalmente se governu dahituk monu maka sei hahú fali prosesu negosiasaun foun ne’ebé lidera fali hosi partidu ne’ebé hetan votus tuir FRETILIN, no sé la akontese tan maka hakat ba eleisaun antesipada.

Prezidente Repúblika fó tomada posse ba Primeiru Ministru Marí Alkatiri iha loron  5 Septembru 2017, iha Palásiuio Nobre, Lahane, Dili.

Hafoin simu posse, tanba governu la hetan apoiu maioria iha parlamentu, rejulta Alkatiri difisil tebes forma nia estrutura governu iha ne’ebé iha momentu ne’ebé Alkatiri kontinua tenta Xanana Gusmão nu’udar xave ba Alkatiri bele garante insidénsia parlamentar hodi asegura estabilidade governativa.

Esforsu Alkatiri nian la hetan rejultadu pozetivu maske formasaun estrutura governu nian tenke dada to’o obriga Prezidente Repúblika fó posse ba membru governu sira ba etapa datolu.

Konsikuensia hosi governu ne’ebé la hetan maioria parlamentar, governu nia programa hetan rejeisaun hosi partidu opozisaun sira kompostu hosi CNRT, PLP ho KHUNTO.

Diskusaun ba programa governu nian hahú iha loron  16 to’o loron 19 Outobru 2017 la konsege kovense partidu opozisaun sira ikus mai programa governu hetan rejeisaun (la pasa) ho rejultadu votasaun kontra 35- abstensaun 0- afavor 30.

Ho forsa polítika ne’ebé opozisaun sira iha, partidu tolu ne’e forma Bloku Opozisaun Parlamentar (BOP) no ikus mai transforma naran ba Aliansa Maioria Parlamentar (AMP) ho estatutu ne’ebé hakarak sai governu alternativa tanba governu koligasaun labele garante ona estabilidade governativa durante tinan lima.

Bainhira opozisaun vota kontra programa governu dahituk nian ne’ebé Primeiru Ministru, Marí Alkatiri rasik mak ba aprejenta. Hosi ne’e kedas Xefe Governu deklara sei la fila tan ba parlamentu atu aprejenta programa ba daruak nian.

Hafoin programa governu nian la hetan aprovasaun iha Parlamentu Nasionál, governu dahituk to’o agora seidauk aprejenta hikas programa ba daruak nian tuir konstituisaun haruka.

Maske nune’e, Alkatiri rasik deklara ona katak, konstituisaun laiha prazu ba aprejentasaun programa daruak nian, maibé governu nafatin kumpri atu iha tempu badak lori programa ba parlamentu ho karater anotasaun. Katak, governu resposta de’it pergunta hotu ne’ebé deputadu sira husu iha plenária ba debate dahuluk programa governu nian no kompleta mos ho dadus. 

Entretantu, tanba governu la lori programa ba daruak nian iha loron tolu-nulu nia laran hafoin programa dahuluk hetan rejeisaun, nune’e mos iha momentu hirak ne’ebé mos governu lori fali orsamentu retifikativu ba parlamentu, maka bloku opozisaun hatama karta mosaun sensura ba meza parlamentu, ho rajaun governu jestaun la devia aprejenta orsamentu bainhira programa seidauk hetan apresiasaun hosi Parlamentu Nasionál.

Situasaun polítika iha parlamentu kontinua la estavel, ikus mai bloku opozisaun sira mos aprejenta tan pedidu destituisaun ba Prezidente Parlamentu Nasionál, Aniceto Guterres, tanba konsidera viola rejimentu parlamentu hahú kedas iha baixa proposta orsamentu retifikativu ne’ebé governu aprejenta ho karater urjénsia ba komisaun no halo demora ajenda ba debate mosaun sensura ba governu.

Situasaun ne’e kontinua dada naruk liu tan bainhira Prezidente Parlamentu Nasionál lori prosesu ba nia ne’e ba Tribunál Rekursu no Tribunál Distrital Dili.

Tanba ne’e, situasaun polítika iha rai laran konsideradu atije iha nivel empasse polítika iha ne’ebé afeta ba situasaun ekonomia no sosial rai laran. To’o fulan neen ona iha loron 22/01, governu dahituk seidauk iha orsamentu jeral estadu ba 2018 nian.

Bazeia ba Konstituisaun RDTL, artigu 86, kompeténsia Prezidente Repúblika nian ba órgaun seluk, maka Prezidente Repúblika rasik seidauk deside uza alineia ida ne’ebé hosi artigu ne’e, maibé bazeia ba alinea F, sura hosi loron  22 Jullu 2017 to’o mai loron  22 Janeiru 2018, kompleta ona fulan neen, maka Prezidente  Repúblika iha loron 23 Janeiru 2018 hahú konvida partidu lima ne’ebé hetan asentu iha parlamentu nasionál (FRETILIN-CNRT-PD-PLP-KHUNTO) hodi rona sira nia opiniaun. Nune’e mos rona Konsellu Estadu hodi nia bele foti desizaun ikus.

Maske nune’e, kontinua mosu oponiaun krítiku hosi bloku opozisaun, iha ne’ebé subliña, rajaun Prezidente Repúblika uza nia kompeténsia hodi hakotu Parlamentu Nasionál, tuir Konstituisaun RDTL, artigu 86, alinea F, ne’ebé haktuir, iha kazu krise boot institusionál nian ne’ebé labele iha formasaun governu ka aprovasaun orsamentu jerál estadu nian. Maibé, ba situasaun atuál, Bloku Aliansa Maioria Parlamentar (AMP) afirma, laiha fatin ba Prezidente Repúblika uza artigu 86, alinea F, tanba Parlamentu Nasionál hahoris tiha ona governu, maibé governu dahituk maka la aprejenta programa no orsamentu jerál estadu ba Parlamentu Nasionál.

“Razaun atu disolve parlamentu tenki haree ba asuntu rua: ida, Labele forma governu. rua, parlamentu labele aprova orsamentu jerál  estadu durante loron 60,” subliña membru AMP, atuál Xefe Bankada CNRT, Arão Noe ba Timor Post via telefone, Kuarta, (24/01).

Nia hatutan, governu dahituk forma konstitusionalmente, maibé to’o agora sein orsamentu jerál  estadu ke tuir konstituisaun governu iha dever atu hala’o kna’ar ida ne’e hafoin Parlamentu Nasionál halo ona apresiasaun ba programa.

“Tamba razaun ne’e mak ami dehan, desizaun saida de’it Prezidente Repúblika foti, CNRT no AMP kumpri maibé tenke tuir konstituisaun,” Arão afirma.

Durante prosesu konsultasaun entre Prezidente Repúblika ho lideransa partidu lima kompostu hosi FRETILIN, CNRT, PLP, PD inklui KHUNTO, hatudu katak maioria  hosi partidu hirak ne’e deside intrega ba Prezidente Repúblika maka deside tuir konstituisaun. 

Maske maioria  partidu entrega ba Prezidente Repúblika maka deside hodi hakotu impasse polítika ne’ebé la’o iha rai laran, maibé iha prosesu konsultasaun, partidu lima ne’e iha sira nia opsaun rasik ne’ebé sira hato’o ba Prezidente Repúblika.

Sekretáriu Jerál Partidu Demokrátiku (PD), Mariano Assinami Sabino, hafoin halo konsulta ho Prezidente Repúblika deklara, pozisaun PD nian maka di’ak liu intrega hikas poder ba povu hodi deside liu hosi Eleisaun Antesipada, maibé sira entrega ba Prezidente Repúblika maka foti desizaun.

“Partidu PD sempre hein katak povu ida ne’e matenek hodi fó ona votus ba partidu lima ne’ebé laiha maioria absoluta hatudu povu nia konsiensia ba multi partidaria, maibé sé lideransa sira la konsege jere konfiansa povu nian, dalan di’ak intrega fila fali poder ba povu, tanba ukun ne’e povu nian,”nia dehan ba jornalista sira iha Palásiu Prezidensial Bairopite, Tersa, (23/1).

Entretantu lideransa sira hosi partidu FRETILIN la konkorda ho estabelesementu Governu Unidade Nasionál maibé dalan úniku maka eleisaun antesipada.

“FRETILIN la aseita ho governu unidade nasionál laiha tan opsaun seluk, sé prezidente repúblika deside foti desizaun AMP forma governu signifika kontra konstituisaun,” afirma Sekretáriu Jerál FRETILIN, Marí Alkatiri.

Entretantu, lideransa sira hosi partidu CNRT sujere Prezidente Repúblika fó fiar ba AMP hodi forma governu daualu. 

Maske nune’e, Prezidente Diretiva Nasionál (CDN), partidu Congresu Nasionál Rekonstrusaun de Timor Leste (CNRT), Deonisio Babo hatete, desizaun saida de’it sira entrega ba Prezidente Repúblika nu’udar aman nasaun maibé CNRT sujere PR fo fiar ba sira hodi forma governu daualu.

Finalmente Prezidente Republika, Francisco Guterres Lu Olo, iha loron 26 Janeiru 2018 deside ona disolve parlamentu nasional lejislatura dahaat, no hakat ba eleisaun antesipada. (cao/ven)

Rejultadu Eleisaun Jeral, 22 Jullu 2017, Partidu 21 mak Kompte, Maibe Partidu Lima mak hetan asentu iha Parlamentu Nasional Lejislatura Dahaat

Alkatiri Sui Fuuk

Mari Bin Amude Alkatiri

Dala ida tan Primeiru Ministru, Marí Bin Amude Alkatiri sui fuuk iha Palásiu Prezidensial, Bairo-Pite, Dili hafoin kumpri konvite Prezidente Repúblika, Francisco Guterres ‘Lú Olo’ hodi halo konsultasaun molok foti desizaun ba hakotu empasse polítika iha rai laran.

Tersa, (23/01), hafoin sorumutu ho Prezidente Repúblika, Alkatiri hetan entrevista hosi Jornalista sira iha Palásiu Prezidensial. Iha momentu ne’e, Alkatiri ko’alia ho Jornalista sira husi mídia nasionál no internasionál ne’ebé antes ne’e hein ona iha sala vizita palásiu nian. Alkatiri ho nia komitiva molok hamriik ba palku konferénsia imprensa nian, Alkatiri hasai sasuit kiik ida husi nia bolsu hodi sui nia fuuk.

Bainhira sui hela fuuk, Jornalista Timor Post halo pergunta ba Xefe Governu katak, signifikadu husi sui fuuk ne’e saida?, Alkatiri resposta ho lian midar katak, sui fuuk atu nia oin sai iha kamera bele bonitu liu tan.

“Signifika? Sui fuuk para ha’u bele sai bonitu liu tan,” Alkatiri resposta badak ba pergunta jornalista nian ne’e ho oin hamnasa. Asanu ne’e halo ambiente iha fatin ne’e sai familiar, iha ne’ebé jornalista sira ho komitiva Xefe Governu nian mos hamnasa.

Tanba la’ós ema baibain no asaun sui fuuk ne’e mos la’ós iha fatin baibain, tuir observasaun Timor Post mosu interpretasaun oioin iha sosiedade nia leet, tantu husi ibun ba ibun no iha rede sosial sira. Ema balun interpreta asaun sui fuuk ne’e nu’udar sinál “kasu todan”, maibé maioria konsidera asaun ne’e baibain hela, iha ne’ebé nu’udar ema hala’o lorloron no toman ka protokolu ema ida-idak nian iha fatin ne’ebé de’it liuliu iha fatin públiku.

Tuir peskija ida ne’ebé fó sai iha http://www.seventeen.com/, haktuir, atividade sui fuuk mos iha benefísiu ba saúde, iha ne’ebé ema sui fuuk bele ajuda sirkulasaun raan iha ulun ne’ebé di’ak liu, no konserteja halo fuuk sai kaber.

Asaun sui fuuk ne’e, Alkatiri halo ona iha plenária uma fukun Parlamentu Nasionál bainhira deputadu opozisaun vota kontra programa governu dahituk nian ne’ebé nia rasik mak ba aprejenta. Husi ne’e kedas Xefe Governu ne’e deklara sei la fila tan ba parlamentu atu aprejenta programa ba daruak nian.

Hafoin programa governu nian la hetan aprovasaun iha Parlamentu Nasionál, governu dahituk to’o agora seidauk aprejenta hikas programa ba daruak nian tuir konstituisaun haruka.

Maske nune’e, Alkatiri rasik deklara ona katak, konstituisaun laiha prazu ba aprejentasaun programa daruak nian, maibé governu nafatin kumpri atu iha tempu badak lori programa ba parlamentu ho karater anotasaun. Katak, governu resposta de’it pergunta hotu ne’ebé deputadu sira husu iha plenária ba debate dahuluk programa governu nian no kompleta mos ho dadus. 

Entretantu, tanba governu la lori programa ba daruak nian iha loron tolu-nulu nia laran hafoin programa dahuluk hetan rejeisaun, nune’e mos iha momentu hirak ne’ebé mos governu lori fali orsamentu retifikativu ba parlamentu, maka bloku opozisaun hatama karta mosaun sensura ba meza parlamentu, ho rajaun governu jestaun la devia aprejenta orsamentu bainhira programa seidauk hetan apresiasaun hosi Parlamentu Nasionál.

Situasaun polítika iha parlamentu kontinua la estavel, ikus mai bloku opozisaun sira mos aprejenta tan pedidu destituisaun ba Prezidente Parlamentu Nasionál, Aniceto Guterres, tanba konsidera viola rejimentu parlamentu hahú kedas iha baixa proposta orsamentu retifikativu ne’ebé governu aprejenta ho karater urjénsia ba komisaun no halo demora ajenda ba debate mosaun sensura ba governu.

Situasaun ne’e hetan dada naruk liu tan bainhira Prezidente Parlamentu Nasionál lori prosesu ba nia ne’e ba Tribunál Rekursu no Tribunál Distrital Dili.

Tanba ne’e, situasaun polítika iha rai laran konsideradu atije iha nivel empasse polítika iha ne’ebé afeta ba situasaun ekonomia no sosial rai laran. To’o fulan neen ona iha loron 23/01, governu dahituk seidauk iha orsamentu jeral estadu ba 2018 nian.

Tuir ajenda, hafoin Prezidente Repúblika rona partidu polítiku lima ne’ebé hetan asentu iha Parlamentu Nasionál inklui, FRETILIN, CNRT, PLP, PD no KHUNTO, Kuarta (24/01), Prezidente Repúblika halibur Konsellu Estadu hodi rona opiniaun ikus, molok nia foti desizaun ba hakotu impasse polítika iha Timor Leste. Ita hein...!

Xave iha Lú Olo

Noémio Falcão

Debates, análiza no komentáriu sira durante la’o namanas iha sosiedade liga ho formasaun governu dahituk hatudu momos jogu demokrátiku iha Timor-Leste la’o iha ambiente paz no hakmatek nia laran.

Ne’e juistika katak mezmu Timor-Leste nu’udar nasaun foun mai ho esperiénsia ne’ebé nakonu ho dezafiu hotu ke hatasak tebes nia populasaun sira atu kontinua hakat ba oin ho ain rasik no esperansa boot.

Situasaun atuál dala ida tan sai teste boot ida ba timoroan tomak atu hakat ba oin liuliu líder polítiku sira hatudu sira-nia maturidade polítika atu tane no kuida nafatin pás no hakmatek no garante dezenvolvimentu ba oin.

Governu koligasaun FRETILIN-PD lideradu Primeiru Ministru, Marí Bin Amude Alkatiri ho estatutu minoritáriu frajil tebes, iha ne’ebé iha de’it kadeira 30 iha Uma Fukun Parlamentu Nasionál, inkuantu opozisaun ho forsa boot 35.

Liga Konstituisaun RDTL, artigu 106, loos duni katak FRETILIN nu’udar partidu mais votadu maka iha direitu ba forma governu, maibé ikus avansa ho koligasaun minoritáriu, ne’e responsabilidade iha mós Prezidente Repúblika nia liman, tanba Prezidente Repúblika maka nu’udar xave ba formasaun governu ida ne’ebé tenke iha forsa parlamentares hodi asegura destinu governu nian tuir mandatu tinan lima.

Iha kazu ida ne’e, Prezidente, Francisco Guterres ‘Lú Olo’, tenke konsiénte no tenke buka ona meius seluk hafoin opozisaun halo mosaun rejeisaun hasoru programa governu ba dahuluk iha uma fukun Parlamentu Nasionál.

Hein katak inisiativa Lú Olo nian halo ona konvite ba líder nasionál sira liuliu Prezidente CNRT, Xanana Gusmão, Prezidente PLP, Taur Matan Ruak, nune’e mos Amu Bispu hosi Dioseze Dili, Baukau no Maliana, bele hetan konsensus ida ba garante estabilidade governativa ba tinan lima.

Atu hetan konsensus ba hametin governu dahituk presiza tebes Lú Olo nia kbiit tomak nu’udar Xefe Estadu atu hahú fali prosesu foun ne’ebé hothotu mak konkorda. Tanba prosesu polítiku dadauk ne’e ida-idak mai ho nia interese iha ne’ebé falun metin ho ida-idak nia dignidade, maka iha kazu ne’e Lú Olo mak tenke brani ho matenek liu dalan ida maka halo remodelasaun radikal ba governu dahituk ka konvida partidu hetan votu barak daruak forma governu daualu. Ita hein...!

Responsabilidade FRETILIN

Noémio Falcão

FRETILIN nu’udar partidu mais votadu rejultadu hosi eleisaun jerál iha loron 22, fulan-Jullu, Tinan 2017. Rejultadu eleisaun ba periodu ida ne’e hatúr FRETILIN hetan kadeira 23, CNRT hetan kadeira 22, PLP kadeira 8, PD kadeira 7 no KHUNTO hetan kadeira 5.

Haktuir konstituisaun RDTL, artigu 106, alinea dahuluk, FRETILIN mak iha direitu atu forma governu. Ikus mai halo koligasaun ho PD total kadeira 30. Ne’e hatudu governu koligasaun ne’e avansa ho governu minoritáriu, iha ne’ebé la garante estabilidade governativa durante mandatu.

La to’o fulan ida Prezidente Repúblika, Francisco Guterres ‘Lú Olo’ nomeia Marí Bin Amude Alkatiri nu’udar Primeiru Ministru ba governu dahituk ne’e, no fó posse, la liu fulan ida, kankada opozisaun CNRT, PLP ho KHUNTO ho kadeira hamutuk 35 forma forsa polítika hanaran Aliansa Maioria Parlamentar (AMP).

Rejultadu  hosi governu koligasaun avansa ho estatutu minoritáriu, iha aprejentasaun programa governu nian ba Parlamentu Nasional hetan rejeisaun hosi bloku opozisaun. Nune’e tuir konstituisaun sei iha oportunidade daruak ba governu hadi’a no lori hikas ba hetan apresiasaun iha Parlamentu Nasionál.

Ita hein katak iha periodu preparasaun ba segundu aprejentasaun programa governu nian, líder sira iha governu koligasaun liuliu Primeiru Ministru, Marí Alkatiri asume responsabilidade ida ne’e atu kontinua halo aprosimasaun ho bankada opozisaun sira hodi garante estabilidade governativa durante tinan lima.

Passu di’ak liu iha prosesu aprosimasaun ke Primeiru Ministru Marí Alkatiri alias governu koligasaun tenke halo maka hatudu hakraik a’an reprejenta povu ho responsabilidade tomak, ko’alia mamar no hatudu respeitu ba reprejentante povu hotu iha uma fukun nu’udar xave atu hetan simpatia.

Normalmente prinsípiu partidu nu’udar organizasaun polítika ida ne’ebé involve iha batalla eleisaun jeral hodi manan poder alias kaer ukun, tanba ne’e iha nasaun demokrátiku sira, espesialmente iha Timor Leste, deputadu sira nu’udar reprejentante povu ho livremente ejerse sira nia direitu ba interese partidu nian. 

Tanba ne’e, iha atmosfera polítika dadaun ne’e  liuliu Alkatiri tenke buka lee hetan polítika AMP nu’udar forsa polítika maioria iha Parlamentu Nasionál halo rejeisaun ba progrma governu nian, bele tanba rajaun programa maka ladi’ak duni, ka, tanba prosesu hari governu dahituk ne’e inkonstitusional, ou tanba interese partidu ida-idak nian iha ne’ebé iha forsa atu hadau ukun hosi FRETILIN ho nia aliadu.

Hirak ne’e hotu presiza análiza no halo avaliasaun hodi fó resposta ne’ebé ho kalmu, tau aan hanesan líder katuas, hatudu uluk ejemplu katuas nian maka hadomi no respeitu malu la haree ba otas nurak ka tuan, nein kór no rasa.

Husi ne’e mak katuas sira bele hetan fatin ne’ebé dignu iha jogu demokrátiku ne’ebé la’o dadauk tuir natureja polítika iha Timor Leste. 

Rai ne’e sarani ona ho naran lulik demokrátiku, deputadu sira iha Parlamentu Nasionál la’ós hatama kurikulum vitae (CV), maibé povu mak hili, no ne’e presiza ita hotu nia respeitu ba sira-nia desizaun maioria.

Insulta, tolok ka halo violénsia ne’e krime, maibé iha uma fukun debates la’o demokrátikamente ne’e hatudu nasaun foun ne’e sai boot liu tan. Ita hein...!

Ita Hein...

Noémio Falcão

Temperatura polítika iha rai laran hahú manas liután bainhira partidu opozisaun CNRT, PLP ho KHUNTO aranja forsa maioritáriu ho kadeira 35, ho hanaran Aliansa Maioria Parlamentar (AMP) no fó ona xamada ba Prezidente Repúblika, Francisco Guterres ‘Lú Olo’, katak governu lideradu Marí Bin Amude Alkatiri frajil tebes tanba avansa ho minoritáriu ho de’it kadeira 30.

Minutu, oras, loron, semana ba fulan troka ba tinan, la’o ba oin nafatin. Husi tempu ba tempu mudansa polítika mos la’o. Partidu polítiku liman, FRETILIN, CNRT, PLP, PD ho KHUNTO, ne’ebé povu delega liuhosi eleisaun jerál tenke toma responsabilidade tomak hodi serví duni povu ho rai ne’e ba moris di’ak.

Partidu polítiku nu’udar organizasaun polítika ida, líder polítiku sira hahoris partidu ida-idak hodi partisipa iha jogu polítiku iha país demokrátiku sira ho regras, baze maka konstituisaun RDTL, iha ne’ebé tenke toma responsabilidade ida ne’e hodi garante pás no estabilidade no fó moris di’ak ba povu.

Realmente governu konstitusionál dahituk lideradu Marí Alkatiri ho nia membru hamutuk 32 simu ona posse hosi Prezidente Repúblika hodi kumpri dever nu’udar servidór estadu, maibé polítikamente governu koligasaun FRETILIN-PD ne’e hakarak ka lakohi tenke hasoru duni laloran boot iha ne’ebé ameasa tebes estabilidade governasaun.

Tuir konstituisaun artigu 108, iha pontu rua nian, primeiru ministru hato’o programa governu nian ne’ebé Konsellu Ministru aprova ho apresia husi parlamentu nasional iha prazu a’as liu loron tolunulu husi loron ne’ebé hahu funsaun governu nian.

Tanba ne’e, governu ne’e atu monu ka la monu, depende ba artigu 112, iha alidea (d) haktuir, bainhira Parlamentu Nasionál la simu ka la aprova programa governu nian dala rua tutuir malu, maka demisaun governu alias governu monu.

Deklarasaun polítika sira hahú manas iha sosiedade nia leet, pro no kontra ba ejisténsia governu dahituk ho nia estatutu minoritáriu kontinua manas, maibé iha tempu hanesan sorte boot liu ba rai ne’e nia povu maka matenek duni, lakohi tan monu ba lasu polítiku sira nian no sira hakarak de’it moris hakmatek, tanba sira konsiente katak tempu naruk nia laran sira terus resik ona.

Oportunidade ida ne’e devia polítiku sira konsidera hanesan osan mean ida hodi konsentra ba dezenvolvimentu paíz, maibé kazu kontráriu nota hosi deklarasaun no jogu polítika sira durante ne’e nota momos kaan ukun hatudu iha sira nia reen toos hafalun ho palavra lulik “sentidu estadu”.

Fi’ar katak timoroan hotu liuliu líder polítiku sira ho matenek boot tetu ho konsikuensia tomak ba rai no povu ne’e nia di’ak ho jogu polítiku hotu, hodi labele kari nafatin rai rahun ba povu nia matan no hadelek povu ho rasionaliza argumentu hotu hodi kontinua soran povu.

Jinástika demokrasia ho livremente maibé tenke ho responsabilidade tomak. Hotu hatuur ona iha konstituisaun ba timoroan tomak iha jogu polítiku labele hateke malu hanesan inimigu permanente maibé ho maturidade tomak hateke ba kotuk hatene istória, maibé hamriik iha ain rasik nu’udar timoroan, hamutuk no hakat ba oin.

Sé de’it maka ukun, partidu ka ema hirak hetan fi’ar ba kaer ukun, dezde-ke la viola konstituisaun, labele ukun ho arogante, labele konsidera ukun nu’udar oportunidade ida ba hadi’a moris, serve de’it interese grupu ki’ik ida liuhosi dalan foer alias Korrupsaun, Koluzaun no Nepotizmu (KKN). Ita hein...! 

Alkatiri ho nia Diverjénsia Polítika

Noemio Falcão

Diverjénsia polítika entre líder polítiku liuliu jerasaun tuan sira sukat la dook hosi temporada bailoron no udan, iha tempu ida fahe malu nune’e mos kazu kontráriu. Diverjénsia ida ne’e husik hela istória ida-idak nian iha ne’ebé foinsa’e sira buka atu aprende no hili tuir di’ak no so’e hirak ne’ebé a’at.

Kuaze fulan ida ona Governu Konstitusionál dahituk funsiona ho estatutu nu’udar governu minoritáriu, hatudu momos diverjénsia polítika entre lideransa sira hosi FRETILIN nu’udar partidu mais votadu, liuliu Sekretáriu Jerál, Marí Bin Amude Alkatiri ho Prezidente Partidu Libertasaun Populár (PLP), Taur Matan Ruak ho Prezidente CNRT, Kayrala Xanana Gusmão dook tebes.

Kona-ba “ukun”, FRETILIN halo kampaña maka’as iha eleisaun liu ba, katak, FRETILIN manan Xanana manan. Xanana ho oin midar de’it, afinál hafoin eleisaun Xanana la fó oin ba Alkatiri iha momentu ne’ebé susar tebes ba FRETILIN ho de’it kadeira 23 forma governu dahituk.

Taur Matan Ruak ne’ebé iha kampaña ho Alkatiri hateke malu matan sorin de’it, maibé Alkatiri deside halo koligasaun ho PLP hodi forma governu maibé la konsege tanba iha prosesu negosiasaun partidu rua ne’e lian la ida.

Jornada polítika hirak ne’e hatudu momos Alkatiri la hetan fatin no iha forsa ida ne’ebé metin hodi asegura nia ajenda polítika ho ró boot FRETILIN. Serake Comite Central FRETILIN (CCF) tenke halo hikas avaliasaun ba evolusaun polítika iha ne’ebé FRETILIN kontinua simu todan sé governu dahituk monu duni tanba laiha forsa maioria iha Parlamentu Nasionál?.

Hafoin estrutura governu lideradu Alkatiri simu posse dahuluk no daruak kompleta membru hamutuk 33, bloku opozisaun CNRT, PLP ho KHUNTO hala’o kedas reasaun hodi afirma governu alternativa hodi antisipa governu dahituk monu iha dalan klaran.

Senáriu ida ne’e fó ameasa boot tebes. Governu koligasaun FRETILIN ho PD tenke rekoñese laiha forsa maioria tanba sira ho de’it kadeira 30, inkuantu bloku opozisaun iha kadeira 35.

Hakarak ka lakohi, laiha fatin iha konstituisaun Repúblika Demokrátika Timor Leste (K-RDTL) atu minoria ukun ka kaer governu tanba iha artigu 109 kona-ba apresiasaun programa governu nian, bainhira Parlamentu Nasionál la aprova dala rua maka governu monu.

Xanana ho Taur la hatudu oin ba malu kleur duni ona, kuaze Taur nia mandatu tomak nu’udar Prezidente Repúblika, líder nain rua ne’ebé iha tempu rejisténsia konsidera malu hanesan maun ho alin, fila kotuk ba malu. Karik ne’e jogu polítika bonitu iha ne’ebé hakarak di’ak liu ba povu no rai ida ne’e?.

Hatudu dadauk CNRT ho PLP hamutuk iha Parlamentu Nasionál laiha buat ida mak taka sé mudansa polítika ida ne’e volante hosi Xanana ho Taur, tanba partidu rua ne’e idéntiku liu ho fígura líder karismátiku Xanana ho Taur. Ita hein...!

Hakraik-án

Hakraik-án, toman ema ida-idak nian. Hahú iha família ida, iha komunidade nia leet, hatudu iha sosiedade ein-jeral. Toman ida ne’e hatudu liuhosi asaun ema ida ba seluk sempre hetan resposta pozetivu iha objetuvu hotu.

Maske nune’e, la ema hotu ho hakraik-án nu’udar dalan úniku ba atinje objetivu ida. Baibain lia dadolin iha dalan barak liuba Roma.

Toman hakraik-án iha sosiedade Timor-Leste, lia feto-san-umane kuda metin doutrina respeitu, konta no tane malu laiha hún no rohan. Hakraik-án hahoris domin, iha ne’ebé oan ba bei-oan lahusik leet no nakfakar folin la’ek.

Liga toman ida ne’e ba ita nia situasaun polítika iha rai laran, timoroan hotu presiza tebes hakraik-án, buka hakuak malu, kahe kabas hodi hakat ho forsa iha tane no lori moris di’ak ba povu no nasaun. Nasaun ida ne’e sosa ho ruin ho raan sura ho folin karun tebes.

Governu dahituk forma tiha ona ho forsa FRETILIN – PD maske minoritáriu tanba sura kadeira 30 de’it iha uma fukun Parlamentu Nasionál, kompara ho opozisaun maioria CNRT – PLP no KHUNTO ho kadeira 35, maibé governu lideradu Primeiru Ministru, Marí Bin Amude Alkatiri eziste tanba hetan ona rekoñesimentu hosi Prezidente Repúblika, Francisco Guterres Lú Olo.

Marka istória foun ho governu monoritáriu iha ita-nia rain. Teória hakerek minoria submete ba maioria, maibé liga ho referénsia hatúr governu ida ne’e ho fi’ar-an tomak hosi bloku koligasaun FRETILIN-PD hodi hakat ba oin.

Situasaun ida ne’e, ne’ebé povu rasik mak hamosu nu’udar teste foun ba maturidade timoroan sira-nian liuliu líder polítiku sira-nian atu deskobre no fó solusaun hotu no hakat ho responsabilidade tomak.

Teste boot liuba destinu governu ida ne’e ho konfiansa tomak bainhira komunga ona toman hakraik-án, sei hatudu rejultadu bainhira aprejenta programa no orsamentu ba Parlamentu Nasionál.

Serake opozisaun sira la’ós tanba hanesan maioria submete ba minoria, maibé hothotu ho hakraik-án bele simu malu?, ka malisan arogánsia ema ida-idak nian maka sei hatohar no hamout intereses pesoal no grupu ki’ik ida nian. Ita hein...

 

Minoria Vs Maioria

Noemio Falcão

Realmente governu konstitusionál dahituk ne’ebé hahoris hosi partidu koligasaun FRETILIN ho PD hetan de’it kadeira 30. Inkuantu partidu opozisaun CNRT, PLP ho KHUNTO hetan kadeira 35.

Ne’e hatudu governu minotitáriu ne’ebé lidera hosi Primeiru Ministru, Marí Bin Amude Alkatiri, ladun estavel.

Opiniaun, krítika no análiza pro no kontra ba desizaun Prezidente Repúblika, Francisco Guterres ‘Lú Olo’ hafoin indijita Primeiru Ministru Marí Alkatiri, maka’as tebes iha sosiedade nia leet.

Hirak ne’ebé pro ba desizaun ne’e mai ho pensamentu ida ke mais importante maka formasaun governu la’o tarde ona povu hein governu foun hodi serví povu ho rai ne’e. Inkuantu hirak ne’ebé kontra konsidera desizaun Prezidente Repúblika nian ne’e falun ho interese partidáriu tanba Prezidente Repúblika nu’udar mos Prezidente FRETILIN.

Loos duni katak, Prezidente Repúblika molok foti desizaun ne’e halo ona konsulta ho partidu tolu ne’ebé hili dalan opozisaun, maibé serake Prezidente Repúblika tetu ho sériu duni kona-ba risku hosi governu minoritáriu?.

Liga ba konstituisaun RDTL, artigu 108, artigu 109, artigu 110, artigu 111 no artigu 112, konklui governu minoritáriu sei la dura to’o tinan lima tanba opozisaun maioritáriu bele vota kontra programa no orsamentu governu nian dala rua tutuir malu governu monu, nune’e mos opozisaun bele halo mosaun sensura iha Parlamentu Nasionál no risku ba eleisaun antisipada boot tebes.

Fi’ar katak partidu ho líder polítiku sira hotu liuliu hirak ne’ebé túr iha Parlamentu Nasionál tane aas interese estadu liu interese privadu ka grupu ki’ik ida nian, maibé tanba jogu polítiku bele iha fo’er kahur hodi atinje objetivu ida.

Ne’e dezafiu boot ida ne’ebé FRETILIN nu’udar partidu mais votadu ho nia aliadu PD, buka atu tetu no sukat progrma no orsamentu jerál estadu bainhira lori ba Parlamentu Nasionál hodi hetan aprovasaun. Partidu koligasaun tenke ho maneira aprosimasaun ne’ebé nakloke no onestu, soe tiha hahalok ego no arogánsia hodi konvense duni opozisaun.

Nota jogu ba okupa ukun hosi líder polítiku sira seidauk to’o nia rohan iha periodu ida ne’e. Maske partidu opozisaun sira liuliu CNRT nu’udar segundu mais votadu deklara abertamente sai opozisaun, maibé hatudu hela sinál hakarak ukun bainhira eleisaun ba Prezidente Parlamentu Nasionál, CNRT mós avansa nia kandidatu no hetan apoiu hosi PLP.

Halo polítika, kada minutu, oras ba loron ida ba seluk la hanesan. Maibé, sé hanesan FRETILIN rasik garante governu inkluzaun no insidénsia parlamnetar laiha garantia ida tanba laiha akordu formal ne’ebé kesi metin opozisaun nia apoiu ba governasaun ida ne’e.

Hirak ne’e hotu malisan demokrasia. Iha meius hotu bainhira tuir hela koridor, sidadaun hotu ho livremente halo polítika ho responsabilidade ba rai no povu nia di’ak. Ita Hein...

Labele Kán Ukun ho Arogánsia

Noemio Falcão

Normalmente nu’udar organizasaun polítika alias partidu polítiku nia objetivu prinsipál maka buka atu kaer ukun.  Eleisaun nu’udar meius ida atu partidu polítiku sira faan sira-nia planu no progrma nu’udar kompromisu polítiku hodi hetan fi’ar hosi povu.

Meius ida ne’e nu’udar prinsípiu demokrasia iha ne’ebé hatuur mós iha Konstituisaun Repúblika Demokrátika Timor Leste (KRDTL), obriga partidu polítiku sira tenke respeita povu nia desizaun liuhosi eleisaun. Katak, poder hosi povu eskolla sira-nia reprezentante hodi serví filafali povu.

Partidu lima, FRETILIN, CNRT, PLP, PD ho KHUNTO mak ultrapasa bareira hodi ba okupa kadeira 65 iha Parlamentu Nasionál. FRETILIN nu’udar partidu mais votadu hetan de’it kadeira 23 labele ukun mesak tanba la prienxe maioria simples ho kadeira 33. Inkuantu CNRT nu’udar partidu segundu mais votadu hetan kadeira 22. Tuir fali PLP hetan kadeira 8, PD hetan kadeira 7 no KHUNTO hetan kadeira 5.

Bazeia ba KRDTL artigu 106, FRETILIN mak iha direitu lidera prosesu formasaun governu, maibé kuaze fulan rua nia laran FRETILIN la konsege hetan nia aliadu hodi prienxe maioria simples (kadeira 33). FRETILIN hetan de’it PD halo koligasaun hamutuk kadeira 30.

Maske rejultadu hatudu la hetan maioria simples, maibé FRETILIN ho PD kontinua avansa ho governu minoritáriu no Prezidente Repúblika, Francisco Guterres Lú Olo indijita ona Primeiru Ministru ba VII governu maka Sekretáriu Jerál FRETILIN, Marí Bin Amude Alkatiri.

Desizaun Prezidente Repúblika nian ne’e hamosu pergunta boot, tanba la devia Prezidente Repúblika konkorda ho governu minoritáriu tanba KRDTL rasik (artigu 106) só hatete Prezidente Repúblika hili partidu ne’ebé manan ka hosi aliansa partidu sira ne’ebé iha nia ema barak iha parlamentu.

Ne’e hatudu VII governu ne’ebé hahoris hosi FRETILIN ho PD frajil bele monu bainhira de’it tanba laiha forsa iha Parlamentu Nasionál atu defende programa no Orsamentu Jerál Estadu (OJE).

Iha situasaun ida ne’e, FRETILIN ho PD mós la devia avansa ho governu minoritáriu, buka atu rekoñese laiha forsa atu garante destinu governu ho fuan boot buka atu konvense CNRT, PLP ho KHUNTO la ho arogánsia iha fahe poder atu evita eleisaun antisipada.

Hirak ne’e hotu tempu la’o dadauk no desizaun sira hatun ona hosi Prezidente Repúblika. Ne’e responsabilidade Prezidente Repúblika tanba prezidente rasik la fó garantia ruma katak sei la akontese eleisaun antisipada ho nia desizaun ne’ebé iha.

Nu’udar nasaun demokrátiku normal sé mosu eleisaun antisipada, maibé intermus Timor-Leste nu’udar nasaun foun prosesu ida ne’e só difikulta de’it prosesu dezenvolvimentu no lakon tempu atu halo mudansa ba povu nia moris hosi terus no susar.

Ita hein katak líder partidu polítiku hotu liuliu partidu lima ne’ebé hetan asentu parlamentar livremente halo polítika hodi atinje objetivu ukun, maibé buka atu kuidadu nafatin ho responsabilidade nu’udar timoroan atu garante povu no rai ne’e nia moris iha paz no estabilidade. Ita Hein...

Tranzisaun Jerasional iha Ibun Tutun

Noemio Falcão

“Halo nusa maka bele  garantia tranzisaun jerasaun tuan ba jerasaun foun, tanba ami ne’e tuur iha kadera to’o monu de’it maka buat ne’e akontese ka?, ami maka tenke ajuda kria kondisoes ba tranzisaun ida ne’e maka ha’u-nia preokupasa,” Alkatiri subliña ba Jornalista sira iha CCF, Segunda (11/09).

Loos duni, preokupasaun Alkatiri nian ne’e pertinente tanba hakarak ka lakohi nu’udar ema nia idade kontinua ba oin no iha loron ida husik mundu espesialmente Timor Leste nu’udar nasaun ida ke labele mate ona.

Tranjisaun jerasionál la’ós foin sai tópiku debates iha públiku maibé hahú kedas governu tranzisaun ONU nian iha Timor Leste maioria jerasaun foun mak involve iha mákina hotu governu tranjisaun no kontinua iha primeiru governu to’o agora.

Maske nune’e, realmente líder katuas alias jerasaun tuan sira nia influensia sei maka’as los. Direta no indiretamente líder katuas sira mak sei kaer xave. Partidu boot sira hanesan FRETILIN ho CNRT  kontinua lidera hosi líder katuas sira.

Ne’e la’ós tanba de’it líder katuas sira mak hakarak, maibé mos foinsa’e sira alias jerasaun foun sira mak ka’er metin katuas sira atu akompaña prosesu tranjisaun jerasional. Serake katuas sira tenke akompaña prosesu ne’e to’o bainhira? Realmente kuaze tinan 20 ona líder katuas sira la husik sira nia poder iha ukun.

Pozisaun Primeiru Ministru nu’udar xave importante hosi órgaun soberanu tolu seluk, Prezidente Repúblika, Parlamentu Nasionál no Tribunal.

Kargu ne’e eis Primeiru Ministru iha V governu, Xanana Gusmão entrega ba Rui Maria de Araújo ema hosi FRETILIN ho rajaun ida maka tranjisaun jerasionál la haree ba koor partidu. Durante jerasaun foun ne’e lidera VI governu kompleta tinan rua, maske mosu polémika kona-ba nia integridade, maibé enjeral susesu.

Serake jerasaun foun seidauk bele iha FRETILIN rasik atu asume pasta Primeiru Ministru ba periodu 2017-2022? Desizaun hotu CCF mak deside bajei mos ba estatutu FRETILIN nian katak, bainhira manan iha eleisaun no forma governu automátikamente sekretáriu jerál maka asume pasta primeiru ministru.

Fi’ar katak Alkatiri nu’udar jerasaun tuan maibé ka’er metin ba nia prinsípiu polítiku defende tranjisaun jerasionál, la’ós iha ibun tutun de’it laran hakarak ka’er metin ukun.  Ita Hein....

Xanana Luta, Ita?

Editór Noemio Falcão kaer liman ho Maun Boot Kay Rala Xanana Gusmão

Buat hotu Xanana. Xanana, Xanana, Xanana. Xanana halo funu ho nia povu manán funu, ema hotu goza. Ema di’ak ka a’at (hakarak ukun-an no lakohi ukun-an) mós goza ho livre tanba Xanana. Xanana aman ba povu no nasaun ne’e. Serake tenke Xanana nafatin luta? luta to’o bainhira? Oinsá sé Xanana laiha? Ita ba ne’ebé?.

Loron hirak liuba Xanana tenke semo ba rai liur hodi luta defende soberania tasi, iha ne’ebé luta foun ida ne’ebé timoroan sira ho esperansa kontinua tula responsabilidade ba Xanana hodi luta tanba fronteira marítima entre Timor-Leste ho Austrália seidauk klaru. Luta ida ne’e Xanana asumi ba vitória total rai no povu Maubere.

La naran karan, buat hotu Xanana. Xanana hiit ain sai hosi Dili, polémika mosu iha rai laran rame liuliu iha konteksu tomada posse ba deputadu sira lejislatura dahaat no formasaun governu konstitusionál dahituk.

Iha parte ida FRETILIN liuhosi nia Sekretáriu Jerál Marí Bin Amude Alkatiri hatete, tenke hein Xanana fila hosi rai liur maka foin hala’o serimónia tomada posse ba deputadu sira lejislatura dahaat; iha sorin seluk, FRETILIN rasik manda karta ba Parlamentu Nasionál husu adia serimónia tomada posse hodi fó tempu ba formasaun governu dahituk, maibé iha sikun seluk mos Prezidente Konsellu Diretiva Nasional (CDN) - CNRT, Dionisio Babo Soares, halo kontra atake hosi públiku liuliu rede sosiál hasoru sira-nia Prezidente, Xanana Gusmão, iha ne’ebé mosu polémika katak Xanana mak nu’udar fatór ne’ebé halo demora kestaun estadu nian.

Ita hotu la hatene Xanana nia hanoin no hakarak, maibé ita mos bele konsiente no tetu katak, sé ita hotu tau esperansa ba luta ne’ebé Xanana infrenta, la siknifika ita tuur iha fatin hodi adora de’it Xanana, no Xanana mós parese lakohi assuntu nasaun nian paradu tanba sein prezensa ninian.

Hein katak Xanana fila hosi rai liur la dehan “tanba sá imi hein ha’u?”. 

Realmete impaktu hosi tomada posse ba deputadu foun sira no formasaun governu tarde maka, lejislatura datoluk kontinua hala’o servisu maske konstituisaun fó mandatu tinan lima de’it, nune’e mos governu tenke nakfilak ba governu jestaun, iha ne’ebé membru governu sira labele foti tan desizaun polítika ruma. No iha kazu ne’e mos fó impaktu ba implementasaun planu no programa no ejekusaun orsamentu jerál estadu.

Realidade ida ne’e hatudu momós sinál líder tuan sira sei sai fatór determinante ba funsionamentu estadu RDTL. Tanba ne’e mos, fi’ar katak líder tuan sira mós konsiénte katak, iha momentu hirak ne’ebé sira sei iha labele husik leet de’it diverjênsia no interese polítika grupu ka pesoál, maibé buka atu hakbiit no fó kompeténsia no akompaña jerasaun foun sira atu kontinua lori povu no nasaun ne’e ba oin. Ita Hein...

Envolve Ukun & Batalla 2022

Tara talin bobar no kesi metin...Hotu-hotu tau Tara...Tara me'ik no kro'at hotu...Ita hein...!!!

Tribunál Rekursu (TR) offisialmente proklama ona rejultadu eleisaun parlamentar periodu 2017 – 2022 iha loron 01/08/2017. Rejultadu ne’e haktuir partidu lima (5) mak liu bareira hodi okupa kadeira 65 iha uma fukun Parlamentu Nasionál.

Rejultadu ne’e mós hakotu FRETILIN nu’udar partidu vensedór okupa kadeira 23, tuir fali CNRT okupa kadeira 22, PLP okupa kadeira 8, PD okupa kadeira 7 no KHUNTO okupa kadeira 5.  

Hosi total kadeira ne’ebé partidu lima ne’e hetan laiha partifu ida maka manan maioria absoluta, katak, hetan kadeira 33 ka 50+1 % hodi bele ukun mesak. Tanba ne’e, hakarak ka lakohi partidu lima ne’e atu forma governu tenke buka kolega hodi hetan forsa polítika iha Parlamentu Nasionál.

Konstituisaun RDTL artigu 106 haktuir katak, partidu ne’ebé manan ka hosi aliansa partidu sira ne’ebé iha nia ema barak iha parlamentu, mak sei hatudu primeiru ministru hafoin mak prezidente repúblika mak sei hili.

Hosi artigu ne’e obriga FRETILIN nu’udar partidu mais votadu buka aprosima ho partidu haat seluk hodi hetan forsa iha parlamentu no hatudu Primeiru Ministru ida atu Prezidente Repúblika bele hili. Maibé artigu ne’e mos loke dalan ba CNRT, PLP, PD no KHUNTO bele hamosu forsa polítika iha parlamentu no indika Primeiru Ministru hodi Prezidente Repúblika tetu no hili.

Hosi interpretasaun ba artigu 106 ne’e, obriga partidu lima ne’ebé hetan asentu atu halo negosiasaun ba kadeira iha governu no kontratu polítiku ne’ebé bele garante estabilidade governasaun durante mandatu tinan lima.

Funsionamentu normal iha nasaun demokrátiku, iha parlamentu nasionál iha forsa polítika rua, iha ne’ebé ida hahoris governu tenke defende planu no programa governu nian, no opozisaun nu’udar forsa ida ne’ebé halo kontrolu no kontra konseitu ne’ebé la refeleta ba interese komum.

Rejultadu justisa popular ne’ebé hatudu liuhosi eleisaun 2017 hatudu golpe hasoru líder polítiku timoroan sira tenke konsiente ona katak, povu hatene eskolla nia reprejentante ba kaer ukun, maibé mos povu hatene halo justisa durante ukun serví duni interese komum ka interese pesoál no grupu kiik ida.

Povu kontinua observa partidu polítiku sira hotu liuliu hirak ne’ebé agora reprejenta povu okupa kadeira ukun nian iha governu no parlamentu. Laiha dalan seluk asaun sa de’it maka ukun nain sira hatudu iha mandatu ida ne’e maka sei sei sai bala iha batalla 2022. Ita Hein....

 

Alkatiri Timoroan

Noemio Falcão

Comite Central FRETILIN (CCF) foti ona desizaun mantein Sekretáriu Jerál FRETILIN, Marí Bin Amude Alkatiri sai Primeiru Ministru ba VII Governu Konstitusionál tuir estatutu FRETILIN nian katak, bainhira manan iha eleisaun ba forma governu automátikamente Sekretáriu Jerál mak asume pasta Primeiru Ministru.

Tanba-sá FRETILIN seidauk forma VII governu? Pergunta ida ne’e kuaze fulan rua ona ema husu ba malu, la’ós de’it iha Dili, iha foho mos la tó ho akompaña de’it televizaun, rádio no jornal, maibé via telefone ba malu, liu rede sosiál, i bainhira ita husi Dili hala’o viazen ba foho sempre hasoru kedas pergunta ne’e hosi povu.

FRETILIN nu’udar partidu mais votadu oportunidade di’ak tebes kompara ho 2007 FRETILIN hela de’it ho naran. Iha momentu ne’ebá partidu hotu-hotu taka odamatan ba FRETILIN ikuas mai CNRT ho nia aliadu forma Aliansa Maioria Parlamentár (AMP) ukun durante tinan lima.

Durante negosiasaun ba formasaun governu, kuaze fulan rua ona FRETILIN lideradu Marí Bin Amude Alkatiri hasoru hotu keda partidu haat seluk, CNRT, PLP, PD ho KHUNTO ne’ebé ultrapasa bareira okupa kadeira iha Parlamentu Nasionál.

Iha semana kotuk FRETILIN konsege asina akordu koligasaun ho PD ho KHUNTO hetan kadeira 35. Ho forsa koligasaun ne’e lori ona Aniceto Guterres eleitu ba Prezidente Parlamentu Nasionál. Maibé tanba-sá seidauk bele forma VII Governu? até sé mak atu sai Primeiru Ministru de’it mos sei iha hela nakukun laran tanba koligasaun seidauk lori naran ba Prezidente Repúblika nomea.

“Ha’u iha direitu atu dehan konkorda ka la konkorda. Iha 2006 krize ne’e mos membru CCF hotu dehan ha’u kontinua nu’udar primeiru ministru, ha’u to’o uma, ha’u toba kalan-la toba, toba la dukur, dia seginte ha’u dehan ba prezidente, imi bele kastiga ha’u mas ha’u rejigna-án,” Alkatiri haktuir ba jornalista sira hafoin partisipa reuniaun CCF iha Sede CCF, Komoro, Dili, Domingu, (10/09). 

Prosesu formasaun governu normalmente iha país demokrátiku sira la’ós brinkadeira? Maibé iha kontekstu Timor Leste ba periodu ida ne’e FRETILIN demora fó impaktu mos ba Prezidente Repúblika Francisco Guterres Lú Olo nu’udar mos prezidente FRETILIN.

Públiku bele de’it halo análiza no komentáriu krítika Lú Olo nu’udar Xefe Estadu la devia husik de’it FRETILIN lori prosesu ne’ebé dada naruk tebes. Lú Olo tenke ezije nafatin ba FRETILIN iha seriedade i halo mos kontaktu ho partidu segundu mais votadu no partidu seluk tuir konstituisaun artigu 106 haruka. 

Iha prosesu ne’e mos Alkatiri tenke toma responsabilidade ne’ebé povu fó fi’ar atu labele demora bebeik formasaun governu i Alkatiri rasik nu’udar timoroan iha direitu romak ho livremente asume kargu Primeiru Ministru, maske iha públiku ema balun kestiona Alkatiri la’ós relijiaun katólika.

Realmente toleránsia relijiaun iha Timor Leste boot tebes, la’ós de’it tanba estadu fó rekoñesimentu mos ba loron boot katólika, musulmanu no relijiaun sira seluk, maibé povu rasik hatudu sira nia fuan boot nu’udar kriatura ne’ebé mai husi hún no abut ida, no nu’udar ema ne’ebé mai ho karaterítika sosiál.

Sai líder polítiku tenke brani infrenta jogu ho adversáriu polítiku. Nune’e mos tenke brani infrenta krítika moruk sira hosi públiku. Maibé tenke lori bola ba oin hasoru dezafius hotu, hetan atake no buka esforsu tomak hodi hetan rejultadu di’ak iha jogu ida. Ita Hein....

“Ukun Mesak La Dura”

Noemio Falcao

Formasaun Governu Konstitusionál dahituk (VII) seidauk serteja. FRETILIN nu’udar partidu mais votadu deklara ona halo koligasaun ho PLP ho KHUNTO maibé kuaze fulan ida ona partidu tolu ne’e seidauk prodús akordu koligasaun hanesan baze legál hodi la’o hamutuk durante tinan lima.

PLP ho KHUNTO rasik mós konkorda ona la’o hamutuk ho FRETILIN, maske PLP ho FRETILIN rasik iha diverjénsia komprimísiu polítiku iha kampaña eleitorál boot tebes. Iha kampaña PLP prefere liu dezenvolvimentu báziku ne’ebé povu sente direta no ameasa redús orsamentu ba mega projetu sira inklui projetu ZEESM ho Tasi Mane, inkuantu FRETILIN prefere kontinua mega projetu, iha ne’ebé nia alvu mos ba povu nia moris di’ak iha futuru.

Kazamentu polítiku partidu tolu ne’e, liuliu FRETILIN ho PLP sei hamosu hela dúvida iha públiku. Komentáriu no análiza balu sei hatete partidu rua ne’e sei la hetan akordu ida bainhira iha negosiasaun no ajustamentu programa polítikus.

Dúvida ba inserteja koligasaun ne’e bele de’it mosu tanba partidu tolu ne’e rasik seidauk iha plataforma koligasaun ne’ebé legál.

Líder boot partidu tolu ne’e rasik mos seidauk tuur hamutuk iha meza ida hodi deklara ba públiku, no ida-idak sei nanal toos hela só ho diplomásia polítika bainhira hatan ba jornalista sira kona-ba fahe pasta iha governu, nune’e mós kargu Primeiru Ministru ho estrutura meza iha uma fukun Parlamentu Nasionál sei iha hela nakukun laran.

Pior liután dúvida ba inserteja koligasaun FRETILIN, PLP ho KHUNTO, maka líder boot Sekretáriu Jerál FRETILIN, Marí Bin Amude Alkatiri Cs halo mós kontaktu ho Partidu Demokrátiku (PD) no deskuti mos akordu inkluzaun.

La’ós ne’e de’it, FRETILIN ko’alia mós ho CNRT maske partidu lideradu Xanana Gusmão ne’e deklara ona sai opozisaun liuhosi konferénsia nasionál. FRETILIN alias Alkatiri prefere liu ukun hamutuk atu gevernu labele nakdoko tanba Alkatiri rasik rekoñese esperiénsia ukun mesak hatudu ona la dura.

Hein katak líder polítiku partidu lima FRETILIN, CNRT, PLP, PD no KHUNTO tau a’as responsabilidade ne’ebé povu fó ona liuliu FRETILIN atu forma governu ida ne’ebé dura. Nune’e mós intermus intereses nasionál, opozisaun ida ne’ebé forte mos atu fó balansu ba ukun durante tinan lima.

Hirak ne’e hotu halai ba intereses partidu ida-idak nian. Polítika iha palku ko’alia midar, maibé iha kotuk sikat no falun ho intereses oioin. Ita Hein....

 

Malisan Demokrasia

Noemio Falcão

Demokrasia nu’udar sistema sosial no polítika estadu ka governu ne’ebé mai hosi povu no ba povu. Timor Leste nu’udar nasaun demokrátiku, iha ne’ebé iha lei no kustumi rasik hodi proteje direitu ema ida-idak nian.

Demokrasia mos iha dezafiu ne’ebé maske nasaun hirak uza sistema demokrasia nia sidadaun sira tenke infrenta nu’udar dezafiu boot maka direitu no dever ema ida-idak nian, iha ne’ebé dala barak ema goza la ho limitasaun.

Liga ba situasaun polítika iha rai laran, líder partidu polítiku sira liuliu partidu lima ne’ebé ultrapasa bareira ba okupa kadeira iha Uma Fukun Parlamentu Nasionál no ka’er ukun iha governu, asumi responsabilidade ne’ebé povu fó liuhosi eleisaun jerál hodi serví fila-fali povu la haree ba kór.

Nota líder polítiku sira hatudu maturidade hodi asumi responsabilidade ida ne’e. Lider katuas alias jerasaun tuan sira no líder foinsa’e alias jerasaun foun sira hatudu balansu iha ukun tuir duni povu nia hakarak.

Rejultadu eleisaun jerál liu ba ne’e povu fó mensajen ne’ebé líder polítika katuas ka foinsa’e tenke konsiénte katak Timor Leste ukun rasik a’an dala ida de’it, nu’udar ema iha loron ida husik mundu, ke presiza duni tranjisaun jerasionál.

Hatudu dadauk Prezidente Repúblika, Francisco Guterres Lú Olo nu’udar jerasaun tuan, Prezidente Parlamentu Nasionál, Aniceto Guterres jerasaun foun, Prezidente Tribunál Rekursu, Deolindos dos Santos jerasaun foun, no hein katak Primeiru Ministru iha VII governu ne’e jerasaun foun.

Polítika, CNRT ho PLP hili ona dalan ba opozisaun. Tenke tane nafatin prinsípiu sai opozisaun edukativu. Katak, nu’udar minoria hanesan organizasaun polítika sé iha karik dalan (celah) ruma maibé agora nu’udar  minoria tenke submete ba FRETILIN, PD ho KHUNTO. Ne’e hatudu malisan demokrasia.

Maske nune’e, partidu ida-idak tenke defende nia prinsípiu polítika nu’udar bukae ba eleisaun tuir mai. Tanba demokrasia minoria tenke submete ba desizaun maioria nian, maibé la signifika opozisaun la ho ruin.

Fi’ar katak CNRT ho PLP nia lider boot Xanana Gusmão ho Taur Matan Ruak bele lori bero rua ne’e ho kuidadu iha intervensaun hotu nu’udar opozisaun iha Parlamentu Nasionál. Nune’e mos nu’udar jerasaun katuas uza oportunidade ida ne’e hodi tulun prosesu hotu ne’ebé di’ak ba povu no nasaun nia di’ak liu.

Malisan demokrasia, minoria submete ba maioria. Ne’e hatudu maioria forte, maibé mos minoria mos tenke forte. Bom Trabalho ba Ukun Nain Sira. Ita Hein...

 

FRETILIN iha ‘Perigu’

Noemio Falcão

Kuriozidade públiku ba formasaun VII governu maka’as liután bainhira partidu lima, FRETILIN, CNRT, PLP, PD no KHUNTO seidauk fó resporta klaramente halo koligasaun hodi indika Primeiru Ministru foun.

FRETILIN nu’udar partidu mais votadu iha momentu ida ne’e susar tebes forma governu lalais bainhira Xanana Gusmão liuhosi konferénsia CNRT foti desizaun sai opozisaun. Inkuantu iha konjuntura polítika CNRT ho FRETILIN liuliu lider boot Xanana ho Alkatiri iha relasuan ne’ebé metin hahú kedas 2013, até iha 2015 Xanana konvida ema FRETILIN nain haat tama iha governu kaer pasta importante inklui Primeiru Ministru.

Loos duni, polítika ne’e la’ós estatistika. Iha ne’ebé FRETILIN alias Alkatiri tau laran metin los ba Xanana, ikus mai Xanana hadook-án derepente de’it. Serake Xanana triste duni ho derota ne’ebé CNRT hetan hosi rejultadu eleisaun lakon kadeira ualu? Ou tanba Xanana lakohi hamutuk ho FRETILIN forma governu tan tinan sanulu liu ona tempu ba FRETILIN ukun ho partidu seluk? Ou bele ho intensaun seluk ba interese nasionál? Importante povu labele sai vítima iha senáriu hirak ne’e hotu.

Kaer ba konstituisaun RDTL artigu 106, iha ona desizaun ne’ebé bele uza hanesan desizaun jurisprudénsia bainhira iha tinan 2007, Prezidente Repúblika, José Ramos Horta hili Aliansa Maioria Parlamenta (AMP) ne’ebé forma hosi CNRT, PD, ASDT, PSD no UNDERTIM, maske FRETILIN iha momentu ne’eba mak manan maioria votus.

Ho rejultadu eleisaun 2017 ne’e, hakarak ka lakohi, FRETILIN tenke buka negosia maka’as ho partidu haat seluk ne’ebé liu bareira parlamentar hodi forma VII governu ne’ebé iha forsa polítika iha Parlamentu Nasionál alias tenke iha kadeira 33 ka 50+1%.

Haree ba ajenda tentativa posse ba membru Parlamentu Nasionál iha loron 22 no posse ba membru governu foun iha 25 ka 26 fulan ne’e, maka tempu kursial tebes ba partidu lima liuliu FRETILIN forma governu, ke presiza lori tempu hodi hetan akordu koligasaun no estabelese estrutura governu foun no hili membru governu sira.

Hein katak FRETILIN nia konvite ba partidu haat seluk, horiseik hahú Alkatiri Cs hasoru malu ona Kalbuadi Cs bele hetan sinál roman ba formasaun governu hafoin hato’o rejultadu reuniaun ho Alkatiri ba Xanana Gusmão.

Karik iha forma seluk ba formasaun VII governu, maibé tempu ba partidu lima ne’ebé okupa uma fukun Parlamentu Nasionál, tantu ukun no opozisaun, ida-idak tenke aposta konsisténsia polítika iha ne’ebé sai rejerva hodi enfrenta julgamentu popular tuir mai.

Hirak ne’e hotu la boot liu interese povu rai lulik ne’e nian. Malisan demokrasia hahoris partidu ida-idak ho idolojia la hanesan maibé tenke tane a’an nafatin povu no nasaun nia interese liu interese individu no grupu ida nian. Ita Hein....!